இரண்டரை மணி நேரம் பேட்டிங் செய்து 4.5 கிலோ எடையை இழந்த ஆஸி. பேட்ஸ்மேன்

ஆஸ்திரேலியா அணி வங்காள தேசம் சென்று இரண்டு போட்டிகள் கொண்ட டெஸ்ட் தொடரில் விளையாடி வருகிறது. பொதுவாக ஆஸ்திரேலியா, நியூசிலாந்து, இங்கிலாந்து அணிகள் ஆசிய கண்டத்தில் விளையாடும்போது சுழற்பந்துக்கு மட்டுமல்ல, வெப்பத்தையும் தாங்க திணறுவார்கள்.

சிட்டகாங்கில் நடைபெற்று வரும் டெஸ்டில் ஆஸ்திரேலிய வீரர் ஹேண்ட்ஸ்காம்ப் வெப்பத்தை தாங்க முடியாமல் 4.5 கிலோ எடையை இழந்துள்ளார்.

ஆஸ்திரேலியா நேற்றைய 2-வது நாள் ஆட்டத்தின்போது பேட்டிங் செய்தது. ஸ்மித் அவுட்டானதும் ஹேண்ட்ஸ்காம்ப் களம் இறங்கினார். மதிய உணவு இடைவேளைக்குப் பிறகு சுமார் இரண்டரை மணி நேரம் அவர் பேட்டிங் செய்தார்.



113 பந்துகளை சந்தித்து 69 ரன்கள் சேர்த்து அவுட்டாகாமல் இருந்தார். வங்காள தேசத்தின் சுழற்பந்துகளை லாவகமாக சமாளித்த ஹேண்ட்ஸ்காம்பால் வெப்பத்தை சமாளிக்க முடியவில்லை. அவரது உடல் வியர்வையால் நனைந்தது. அடிக்கடி ஐஸ் கட்டி பேக் வைத்து வெப்பத்தை தணிக்க முயற்சித்தார். இருந்தாலும் முடியவில்லை. இரண்டரை மணி நேரம் வெயிலில் நின்று விளையாடியதன் காரணமாக அவரது எடையில் 4.5 கிலோ குறைந்துவிட்டது.