பெங்களூர்:
10-வது ஐ.பி.எல். போட்டியின் 29-வது ‘லீக்’ ஆட்டம் பெங்களூர் சின்னச்சாமி ஸ்டேடியத்தில் இன்று இரவு 8 மணிக்கு நடக்கிறது.
இதில் விராட் கோலி தலைமையிலான ராயல் சேலஞ்சர்ஸ் பெங்களூர்- வார்னர் தலைமையிலான சன்ரைசர்ஸ் ஐதராபாத் அணிகள் மோதுகின்றன.
சிறந்த வீரர்களை கொண்ட பெங்களூர் அணி கடைசி இடத்தில் இருக்கிறது. அந்த அணி 2 வெற்றி, 5 தோல்வியுடன் 4 புள்ளிகள் பெற்றுள்ளது. குஜராத், டெல்லி அணிகளை வென்று இருந்தது. ஐதராபாத், புனே, மும்பை, பஞ்சாப், கொல்கத்தா அணிகளிடம் தோற்று இருந்தது.
நடப்பு சாம்பியனான ஐதராபாத்திடம் 35 ரன்னில் தொடக்க ஆட்டத்தில் தோற்றதற்கு பெங்களூர் அணி பதிலடி கொடுத்து 3-வது வெற்றியை பெறுமா? என்று எதிர்பார்க்கப்படுகிறது. அந்த அணி கொல்கத்தாவிடம் 49 ரன்னில் சுருண்டு மோசமான தோல்வியை தழுவியது. அதில் இருந்து மீண்டு பெங்களூர் அணி எழுச்சி பெறும் ஆர்வத்துடன் உள்ளது.
ஐதராபாத் அணி 4 வெற்றி, 3 தோல்வியுடன் 8 புள்ளிகள் பெற்றுள்ளது. அந்த அணி பெங்களூர், குஜராத், பஞ்சாப், டெல்லி அணிகளை வீழ்த்தி இருந்தது. மும்பை, கொல்கத்தா, புனே அணிகளிடம் தோற்று இருந்தது.
ஏற்கனவே பெங்களூரை வீழ்த்தி இருந்ததால் அந்த அணி மிகுந்த நம்பிக்கையுடன் உள்ளது. 5-வது வெற்றி ஆர்வத்துடன் அந்த அணி இருக்கிறது.
இரு அணிகள் மோதிய ஆட்டத்தில் ஐதராபாத் 6 போட்டியிலும், பெங்களூர் 4 ஆட்டத்திலும் வெற்றி பெற்றுள்ளன.
