தொடக்க ஆட்டத்தில் புனே அணியிடம் தோல்வி கண்ட மும்பை இந்தியன்ஸ் அணிக்கு அதன் பிறகு எல்லாமே ஏறுமுகம் தான். தொடர்ச்சியாக 5 ஆட்டங்களில் வெற்றி பெற்று ‘ராஜநடை’ போட்டு வரும் மும்பை இந்தியன்ஸ் அணி அந்த பயணத்தை நீட்டிக்கும் வேட்கையுடன் ஆயத்தமாக உள்ளது. சொந்த ஊரில் (மும்பை வான்கடே மைதானம்) ஆடுவது அந்த அணிக்கு இன்னொரு சாதகமான அம்சமாகும்.
மும்பை அணியில், பந்து வீச்சு பெரிய அளவில் எடுபடாவிட்டாலும், பேட்ஸ்மேன்கள் சரியான நேரத்தில் கைகொடுக்கிறார்கள். நிதிஷ் ராணா (3 அரைசதத்துடன் 255 ரன்) ஜோஸ் பட்லர், கேப்டன் ரோகித் சர்மா, பார்த்தீவ் பட்டேல், பொல்லார்ட், ஹர்திக் பாண்ட்யா, குணால் பாண்ட்யா உள்ளிட்டோர் அதிரடியில் அட்டகாசப்படுத்துகிறார்கள்.
இதில் இன்னொரு வேடிக்கை என்னவென்றால் அந்த அணி 5 ஆட்டங்களிலும் ‘சேசிங்’ செய்தே வெற்றி பெற்றிருக்கிறது. மும்பை மைதானமும் 2-வது பேட்டிங்குக்கே உகந்தது என்பதால் டாஸ் வெல்லும் அணி முதலில் பந்து வீச்சுக்கே முன்னுரிமை கொடுக்கும்.
ஜாகீர்கான் தலைமையிலான இளம் வீரர்களை கொண்ட டெல்லி அணி 2-ல் வெற்றி, 3-ல் தோல்வி என்று இதுவரை 4 புள்ளிகளை சேர்த்துள்ளது. டெல்லி அணியை பொறுத்தவரை தோல்வி கண்ட ஆட்டங்களிலும்கூட கடுமையாக போராடித்தான் பணிந்திருக்கிறது. அதனால் மும்பையின் ஆதிக்கத்துக்கு அணைபோடுவதற்கு எல்லா வகையிலும் கடுமையாக முயற்சிப்பார்கள்.
