ஐ.பி.எல்.: குஜராத்தை வீழ்த்தி நான்காவது வெற்றியை பதிவு செய்தது மும்பை இந்தியன்ஸ்

மும்பை வான்கடே மைதானத்தில் மும்பை இந்தியன்ஸ் - குஜராத் லயன்ஸ் அணிகளுக்கு இடையிலான போட்டி நடைபெற்றது. டாஸ் வென்ற மும்பை அணி கேப்டன் ரோகித் சர்மா பீல்டிங் தேர்வு செய்தார். அதன்படி குஜராத் அணி முதலில் பேட்டிங் செய்தது. மெக்கல்லம் (66), தினேஷ் கார்த்திக் (48 அவுட் இல்லை) ஆகியோரின் சிறப்பான ஆட்டத்தால் 20 ஓவரில் 4 விக்கெட் இழப்பிற்கு 176 ரன்கள் சேர்த்தது.

பின்னர் 177 ரன்கள் எடுத்தால் வெற்றி என்ற இலக்குடன் மும்பை இந்தியன்ஸ் அணியின் பார்தீப் பட்டேல், பட்லர் ஆகியோர் தொடக்க வீரர்களாக களம் இறங்கினார்கள். ஆட்டத்தின் 2-வது பந்தில் பட்டேல் ரன்ஏதும் எடுக்காமல் டக்அவுட் ஆனார்.

அடுத்து பட்லர் உடன் ராணா ஜோடி சேர்ந்தார். இந்த தொடரில் அசத்தி வரும் ராணா இந்த போட்டியிலும் அபாரமான ஆட்டத்தை வெளிப்படுத்தினார். அவர் 36 பந்தில் 53 ரன்கள் சேர்த்து ஆட்டம் இழந்தார். அடுத்து வந்த பொல்லார்டு அதிரடியாக விளையாடி 23 பந்தில் 39 ரன்கள் சேர்த்தார். இதற்கிடையே பட்லர் 26 ரன்னில் வெளியேறினார்.

கேப்டன் ரோகித் சர்மா அவுட்டாகாமல் 29 பந்தில் 40 ரன்கள் சேர்க்க மும்பை இந்தியன்ஸ் 19.3 ஓவரில் 177 ரன்கள் எடுத்து 6 விக்கெட் வித்தியாசத்தில் வெற்றி பெற்றது.

இந்த சீசனில் ஐந்து போட்டிகளில் விளையாடியுள்ள மும்பை இந்தியன்ஸ் அணிக்கு, இது நான்காவது வெற்றியாகும். முதல் போட்டியில் தோல்வியடைந்தபின் தொடர்ச்சியாக நான்கு வெற்றிகளை பெற்றுள்ளது.