ஐ.பி.எல். கிரிக்கெட்டில் ஒவ்வொரு தொடரிலும் அதிக ரன்கள் குவிக்கும் வீரருக்கு ஆரஞ்சு நிற தொப்பியும், அதிக விக்கெட்டுகளை வீழ்த்தும் வீரருக்கு ஊதா நிற தொப்பியும் வழங்கப்படுகிறது. ஒவ்வொரு ஆட்டத்தின் முடிவிலும் யார் முன்னணியில் இருக்கிறார்களோ? அவர்களின் தலையை இந்த தொப்பி அலங்கரித்துக் கொண்டே இருக்கும். அந்த தொப்பியுடன் தான் களத்தில் வலம் வருவார்கள். ஐ.பி.எல். நிறைவில் ரன் குவிப்பிலும், விக்கெட் வேட்டையிலும் முதலிடத்தில் இருக்கும் வீரர்களிடம் அது கடைசியாக சென்றடையும். இந்த தொப்பியை வசப்படுத்தும் வீரருக்கு ரூ.10 லட்சம் பரிசு அளிக்கப்படும்.
கவுரவமிக்க ஆரஞ்சு நிற தொப்பியை ஷான் மார்ஷ், மேத்யூ ஹைடன், சச்சின் தெண்டுல்கர், கிறிஸ் கெய்ல் (2 முறை), மைக் ஹஸ்சி, ராபின் உத்தப்பா, டேவிட் வார்னர், விராட் கோலி ஆகியோரும், ஊதா நிற தொப்பியை சோகைல் தன்விர், ஆர்.பி.சிங், பிரக்யான் ஓஜா, மலிங்கா, மோர்னே மோர்கல், வெய்ன் பிராவோ (2 முறை) மொகித் ஷர்மா, புவனேஷ்வர்குமார் ஆகியோர் பெற்று இருக்கிறார்கள்.
