இந்தியா - வங்காளதேசம் டெஸ்ட் கண்ணோட்டம்

இந்தியா-வங்காளதேசம் அணிகள் இடையேயான டெஸ்ட் போட்டி 2000ம் ஆண்டு அறிமுகம் செய்யப்பட்டது. டாக்காவில் நடந்த முதல் டெஸ்ட் போட்டியில் இந்தியா 9 விக்கெட் வித்தியாசத்தில் வெற்றி பெற்றது. கடைசியாக 2015ம் ஆண்டு ஜூன் மாதம் பதுல்லாவில் நடந்த போட்டி ‘டிரா’ ஆனது. இரு அணிகள் இடையே இதுவரை 8 டெஸ்ட் நடைபெற்றுள்ளது. இதில் இந்தியா 6 டெஸ்டில் வெற்றி பெற்றுள்ளது. 2 போட்டி ‘டிரா’ ஆனது.

இந்த 8 டெஸ்டுகளும் வங்காளதேசத்தில் தான் நடைபெற்றது. தற்போதுதான் முதல் முறையாக வங்காளதேச அணி இந்தியாவில் டெஸ்டில் ஆட இருக்கிறது. இரு அணிகள் இடையே 5 டெஸ்ட் தொடர் நடந்துள்ளது. இதில் 4 தொடரை இந்தியா கைப்பற்றியது. ஒரு தொடர் ‘டிரா’ ஆனது.

இந்திய அணி 2007ம் ஆண்டு டாக்கா மைதானத்தில் 3 விக்கெட் இழப்புக்கு 610 ரன் குவித்ததே அதிகபட்ச ஸ்கோராகும். வங்காளதேச அணி 2000ம் ஆண்டு அதிகபட்சமாக 400 ரன் குவித்து இருந்தது.

வங்காளதேச அணி 91 ரன்னில் சுருண்டதே குறைந்த பட்ச ஸ்கோராகும். இந்திய அணி 2010-ம் ஆண்டு சிட்டாகாங்கில் 243 ரன்னில் ‘ஆல்அவுட்’ ஆனதே குறைந்தபட்ச ஸ்கோராகும்.

தெண்டுல்கர் 7 டெஸ்டில் 820 ரன் எடுத்து முதலிடத்தில் உள்ளார். இதில் 5 சதம் அடங்கும். டிராவிட் 560 ரன்னும், அஸ்ரபுல் 386 ரன்னும் எடுத்து உள்ளனர். தெண்டுல்கர் 2004ம் ஆண்டு டாக்கா மைதானத்தில் 248 ரன் குவித்ததே ஒரு இன்னிங்சின் அதிகபட்ச ஸ்கோராகும். அவருக்கு அடுத்தப்படியாக தவான் 173 ரன் எடுத்து உள்ளார்.

ஜாகீர்கான் 7 டெஸ்டில் 31 விக்கெட் கைப்பற்றி உள்ளார். அவருக்கு அடுத்தப்படியாக பதான் 18 விக்கெட் எடுத்துள்ளார். ஜாகீர்கான் 87 ரன் கொடுத்து 7 விக்கெட் வீழ்த்தியது ஒரு இன்னிங்சில் சிறந்த பந்து வீச்சாகும். இர்பான் பதான் 96 ரன் கொடுத்து 11 விக்கெட் எடுத்தது ஒரு டெஸ்டின் சிறந்த பந்து வீச்சு ஆகும்.