பருப்பு வகைகள் கிலோவுக்கு ரூ.20 வரை சரிவு

சென்னை:

மளிகை பொருட்களில் முக்கியமான இடத்தில் பருப்பு வகைகள் இருக்கின்றன. மொத்த மார்க்கெட்டில் துவரம் பருப்பு கடந்த 2 ஆண்டுகளுக்கு முன்பு ஒரு கிலோ ரூ.175-க்கும், கடந்த ஆண்டில் ரூ.150-க்கும் விற்பனை ஆனது. கடந்த 3 மாதங்களுக்கு முன்பு ரூ.130 என்ற நிலைக்கு வந்தது. தற்போது அதன் விலை மேலும் குறைந்து தற்போது ரூ.105 முதல் ரூ.110 வரை விற்பனை செய்யப்படுகிறது. சில்லரை கடைகளில் இதைவிட சற்று அதிகம் விற்கப்பட வாய்ப்புள்ளது.

இதேபோல், உளுந்தம்பருப்பு விலை கடந்த 3 மாதங்களுக்கு முன்பு மொத்த மார்க்கெட்டில் ரூ.125-க்கு விற்கப்பட்ட நிலையில், தற்போது ரூ.115-க்கு விற்பனை ஆனது. இதுதவிர பாசிப் பருப்பை எடுத்துக் கொண்டால், கடந்த 3 மாதங்களுக்கு முன்பு, 50 கிலோ கொண்ட மூட்டை ரூ.5 ஆயிரத்து 800 வரை விற்கப்பட்டது. தற்போது அதன் விலை ரூ.5,200 என்ற நிலைக்கு வந்திருக்கிறது. இப்படியாக பருப்பு வகைகளின் விலை கடந்த 3 மாதங்களுக்கு முன்பு இருந்த விலையைவிட கிலோவுக்கு ரூ.20 வரை குறைந்து இருப்பதை பார்க்க முடிகிறது.

அண்டை மற்றும் வட மாநிலங்களில் பருப்பு விளைச்சல் அமோகமாக இருப்பதால், அதன் வரத்து அதிகரித்து காணப்படுகிறது. இதன் காரணமாக விலை குறைந்து வருவது குறிப்பிடத்தக்கது.