சுமார் 23 லட்சம் மாணவர்களின் எதிர்காலத்தை பாதித்துள்ள நீட் தேர்வு வினாத்தாள் கசிவு குறித்த விசாரணையில் ஒரு பெரிய திருப்புமுனை ஏற்பட்டுள்ளதாக சி.பி.ஐ. தெரிவித்துள்ளது. நாடு முழுக்க பெரும் அதிர்வலைகளை ஏற்படுத்திய இந்த சதித்திட்டத்தின் முக்கிய மூளையாக செயல்பட்டவரை கைது செய்துள்ளதாக சி.பி.ஐ. அறிவித்துள்ளது.
புனேவை சேர்ந்த வேதியியல் பேராசிரியர் பி.வி. குல்கர்னியை தங்கள் காவலில் எடுத்துள்ளதாகவும், அவரே வினாத்தாள் கசிவின் மூலக்காரணம் என்றும் சிபிஐ தெரிவித்தது. இந்த வழக்கில் அந்த அமைப்பால் கைது செய்யப்பட்ட எட்டாவது நபரான குல்கர்னி, தேசிய தேர்வு முகமையின் சார்பாக மருத்துவ நுழைவு தேர்வு நடவடிக்கைகளில் ஈடுபட்டிருந்ததன் ஒரு பகுதியாக, அதற்கான வினாத்தாள்களை அணுகும் வாய்ப்பை பெற்றிருந்ததாகவும், அதை தவறாகப் பயன்படுத்தி மாணவர்களுக்கு வினாக்களை கசியவிட்டதாகவும் அதிகாரிகள் தெரிவித்தனர்.
மகாராஷ்டிராவின் லாத்தூரை பூர்வீகமாக கொண்ட அந்த வேதியியல் ஆசிரியர், புனேவில் உள்ள தனது இல்லத்தில் 'ராஜ் கோச்சிங் கிளாசஸ்' என்ற பெயரில் தனிப்பட்ட முறையிலும் கற்பித்தார். அத்தகைய ஒரு வகுப்பு, நீட் தேர்வுக்கு சற்று முன்பு, ஏப்ரல் மாதத்தின் கடைசி வாரத்தில் நடத்தப்பட்டது. அந்த வகுப்பின்போது, அவர் கேள்விகளையும், அவற்றுக்கான விடைகளையும், சரியான பதில்களையும் சொல்ல, மாணவர்கள் அவற்றை தங்கள் குறிப்பேடுகளில் குறித்துக்கொண்டனர்.
மாணவர்களின் நோட்டு புத்தகங்களில் எழுதப்பட்டிருந்த கேள்விகளை, மே 03-ஆம் தேதியன்று நடைபெற்ற தேர்வின் உண்மையான வினாத்தாளுடன் ஒப்பிட்டு பார்த்தபோது , பல கேள்விகள் வார்த்தைக்கு வார்த்தை ஒத்துப்போயின என்று ஓர் அதிகாரி கூறினார். தேர்வு செயல்முறையுடன் நேரடியாக தொடர்புடைய ஒருவரே வினாத்தாள் கசிவின் மூலக்காரணம் என்பதை சிபிஐ உறுதிப்படுத்த இது உதவியது.
