நீங்கள் தேடியது "Honda EV"

ஹோண்டா நிறுவனம், பாரத் மொபிலிட்டி குளோபல் எக்ஸ்போ 2025 நிகழ்வில் ஆக்டிவா இ மாடலை ரூ. 1.17 லட்சம் (எக்ஸ்-ஷோரூம்) ஆரம்ப விலையில் அறிமுகம் செய்தது. இந்தியாவில் மின்சார இருசக்கர வாகன சந்தை வளர்ந்து வந்தாலும், நாட்டில் இன்னும் உள்கட்டமைப்பு பற்றாக்குறை உள்ளது. ஹோண்டா ஆக்டிவா இ மாடலில் பேட்டரி மாற்றும் அமைப்பு மூலம் சார்ஜிங் வசதி உள்ளது.

தற்போது வெளியாகி இருக்கும் அறிக்கைகளின்படி, ஹோண்டா நிறுவனம் இந்தியாவில் ஆக்டிவா இ மாடலுக்கு சார்ஜிங் டாக் அறிமுகப்படுத்த திட்டமிட்டுள்ளது. சார்ஜிங் டாக் மூலம் பயனர்கள் வீட்டிலேயே மின்சார ஸ்கூட்டரை சார்ஜ் செய்யலாம். ஹோண்டா நிறுவனம் ஏற்கனவே ஐரோப்பா போன்ற பிற நாடுகளில் இந்த அமைப்பை வழங்கி வரும் நிலையில், இந்த வசதி விரைவில் இந்தியாவிலும் கிடைக்கும் என்று எதிர்பார்க்கப்படுகிறது.

இந்தியாவில் ஏராளமான மின்சார இரு சக்கர வாகன ஆப்ஷன்கள் கிடைப்பதால், பயனர்கள் இப்போது ரேஞ்ச் மற்றும் பிற அம்சங்களில் கவனம் செலுத்துவதோடு மட்டுமல்லாமல், சார்ஜிங் மற்றும் சேவைக்கான செலவு போன்ற முக்கிய காரணிகளையும் கருத்தில் கொள்கிறார்கள்.

ஐரோப்பிய சந்தையில் விற்கப்படும் ஹோண்டா CUV இந்தியாவில் கிடைக்கும் ஆக்டிவா இ மாடலை போலவே உள்ளது. இருப்பினும், CUV:e 270W டாக் சார்ஜரைப் பெறுகிறது. இதை கொண்டு பேட்டரியை முழுமையாக சார்ஜ் செய்ய 6 மணி நேரம் ஆகும்.

ஹோண்டா நிறுவனம் இரு பிரீமியம் ஸ்கூட்டர் மாடல்களை இந்தியாவில் அறிமுகம் செய்வதற்கான காப்புரிமை கோரி விண்ணப்பித்து இருந்தது. இந்த நிலையில், ஹோண்டா தனது எலெக்ட்ரிக் ஸ்கூட்டர் மாடலுக்கான காப்புரிமை கோரி விண்ணப்பித்து இருக்கிறது. புது எலெக்ட்ரிக் ஸ்கூட்டர் ஹோண்டா U Go EV என்ற பெயரில் அறிமுகம் செய்யப்பட உள்ளது.

ஹோண்டா U Go EV மாடல் ஏற்கனவே சீன சந்தையில் விற்பனை செய்யப்பட்டு வருகிறது. இதில் ஏராளமான அம்சங்கள் மற்றும் அதிக செயல்திறன் வழங்குகிறது. இந்த ஸ்கூட்டரில் BLDC மோட்டார் உள்ளது. இது 1200 வாட்ஸ் மற்றும் 800 வாட்ஸ் என இருவிதங்களில் கிடைக்கிறது. இத்துடன் கழற்றக்கூடிய வசதி கொண்ட 30Ah லித்தியம் அயன் பேட்டரி உள்ளது. இந்த ஸ்கூட்டர் முழு சார்ஜ் செய்தால் 75 கிலோமீட்டர் ரேன்ஜ் வழங்குகிறது.

இதன் டூயல் பேட்டரி பேர் மாடல் முழு சார்ஜ் செய்தால் 130 கிலோமீட்டர் ரேன்ஜ் வழங்கும். ஹோண்டா U Go EV ஸ்கூட்டர் மணிக்கு அதிகபட்சம் 53 கிலோமீட்டர் வேகத்தில் செல்லும் திறன் கொண்டு இருக்கிறது. மேலும் இந்த மாடலில் எல்.இ.டி. டி.ஆர்.எல்.கள், ஹெட்லேம்ப், எல்.சி.டி. இன்ஸ்ட்ரூமெண்ட் கிளஸ்டர், ஆண்டி தெப்ட் அலாரம், யு.எஸ்.பி. சார்ஜிங், 26 லிட்டர் அண்டர் சீட் ஸ்டோரேஜ் வழங்கப்படுகிறது.

தற்போது காப்புரிமை பெற்று இருக்கும் நிலையில் விரைவில் ஹோண்டா எலெக்ட்ரிக் ஸ்கூட்டர் அறிமுகம் செய்யப்படுமா என்பது கேள்விக்குறியாகவே உள்ளது. எனினும், இந்திய சந்தையில் தனது முதல் எலெக்ட்ரிக் ஸ்கூட்டரில் ஹோண்டா பேட்டரி மாற்றும் வசதியை வழங்கும் என எதிர்பார்க்கப்படுகிறது.