புதுக்கோட்டை:
கந்தர்வகோட்டையில் இந்திய விவசாயிகள் சங்கம் சார்பில், மத்திய அரசின் மின் திருத்த சட்ட மசோதா நகல் எரிப்பு போராட்டம் நடைபெற்றது. போராட்டத்தில் நடைபெற்றுக் கொண்டிருக்கும் நாடாளுமன்ற கூட்டத்தொடரில் மின் திருத்த சட்ட மசோதாவை மத்திய அரசு நிறைவேற்றி உள்ளது. இதை கண்டித்து நாடு முழுவதும் விவசாயிகள் சங்கம் சார்பில் ஒன்றிய அரசின் மின் திருத்த சட்ட மசோதா நகல் எரிப்பு போராட்டம் நடைபெற்று வருகிறது.
இதன் ஒரு பகுதியாக கந்தர்வகோட்டையில் புதுக்கோட்டை மாவட்ட விவசாயிகள் சங்கத் தலைவர் ராமையன் தலைமையில் சட்ட மசோதா நகல் எரிப்பு போராட்டம் நடைபெற்றது. இந்த போராட்டத்தில் தமிழ்நாடு விவசாயிகள் சங்கத்தின் ஒன்றிய தலைவர் சேட்டு துரை, தமிழ்நாடு விவசாய சங்கத்தின் ஒன்றிய செயலாளர் நாராயணசாமி, இந்திய ஜனநாயக வாலிபர் சங்கத்தின் மாவட்ட துணை செயலாளர் இளையராஜா, வாலிபர் சங்கத்தின் ஒன்றிய தலைவர் லெனின், ஒன்றிய செயலாளர் ராஜேஷ், மற்றும் தமிழ்நாடு விவசாயிகள் சங்கத்தின் இடைக்கமிட்டு உறுப்பினர்கள், முன்னணி தோழர்கள் கலந்து கொண்டார்கள்.
