நீங்கள் தேடியது "ஓடு ராஜா ஓடு"

சென்னையில் கதாசிரியராக இருக்கிறார் நாயகன் குருசோம சுந்தரம். இவரது மனைவி லட்சுமி பிரியா மருத்துவமனையில் வேலை பார்த்து வருகிறார். இவர் வீட்டில் செட்-அப் பாக்ஸ் வாங்கி படம் பார்க்க ஆசைப்படுகிறார். இதற்காக குருசோம சுந்தரத்திடம் பணம் கொடுத்து வாங்க சொல்லுகிறார்.

அந்த பகுதியில் கஞ்சா விற்று வரும் தனது நண்பருடன் சேர்ந்து செட்-அப் பாக்ஸ் வாங்க செல்லுகிறார் குரு சோமசுந்தரம். அங்கு எதிர்பாராத விதமாக பணத்தை இழக்கிறார். மேலும் சிக்கலில் மாட்டிக் கொள்கிறார்.

அந்த பகுதியில் பெரிய தாதாவாக இருக்கும் சாருஹாசன், கவலைக்கிடமான நிலையில், இனிமேல் ரவுடி தொழில் செய்யக் கூடாது என்று அவரது மகன் நாசரிடம் சத்தியம் வாங்கி விடுகிறார். ஆனால், இவரது தம்பியோ நாசரை கொன்று விட்டு, தாதாவாக முயற்சி செய்கிறார்.

நாசரால் ஏமாற்றப்பட்ட ஒருவர் 5 வருடம் சிறை தண்டனை பெற்று வெளியில் வருகிறார். நாசரை கடத்தி அவரிடம் பணம் பறிக்க முயற்சி செய்கிறார்.

அதே பகுதியில் ஆதரவற்ற சிறுவர்கள் சிறு சிறு திருட்டு தொழில்கள் செய்து வருகிறார்கள். இவர்கள் நான்கு பேரும் ஒரு பிரச்சனையில் சந்திக்கிறார்கள். இறுதியில் என்ன ஆனது? குருசோம சுந்தரம் செட்-அப் பாக்ஸ் வாங்கினாரா? என்பதே படத்தின் மீதிக்கதை.

படத்தின் கதாநாயகனாக நடித்திருக்கும் குருசோம சுந்தரம் எதார்த்தமான நடிப்பால் ரசிகர்களை கவர்ந்திருக்கிறார். கதாசிரியராக கிளைமாக்ஸ் கிடைக்காமல் தவிப்பது, நண்பருடன் சேர்ந்து செட்-அப் பாக்ஸ் பணத்தை இழந்து தவிப்பது. அதை மீட்க போராடுவது, மனைவிக்கு பயப்படுவது என சிறப்பான நடிப்பை வெளிப்படுத்தி இருக்கிறார். 

இவருக்கு மனைவியாக வரும் லட்சுமி பிரியா, கோபப்படும் மனைவியாக நடித்திருக்கிறார். நண்பராக வருபவர் கொடுத்த வேலையை செய்திருக்கிறார். தன்னுடைய அனுபவ நடிப்பால் மனதில் பதிகிறார் நாசர். மற்ற கதாபாத்திரங்கள் அவரவர் வேலையை செவ்வனே செய்திருக்கிறார்கள்.

டார்க் காமெடி பாணியில் படத்தை இயக்கி இருக்கிறார்கள் ஜதின் மற்றும் நிஷாந்த். படம் ஆரம்பத்தில் வெவ்வேறு கதைகள் அங்கும் இங்குமாக திரைக்கதை அமைந்தாலும், பிற்பாதியில் சரியாக ஒன்று சேர்த்திருக்கிறார்கள். பல இடங்களில் டார்க் காமெடி ஒர்க் அவுட் ஆகி இருக்கிறது. ஒரு செட்-அப் பாக்சில் ஆரம்பித்து அதை வாங்குவதற்கு இடையே நடக்கும் பல சிக்கல்களை ரசிக்கும்படி கொடுத்திருக்கிறார்கள்.

தோஷ் நந்தாவின் இசையில் பாடல்கள் பின்னணி இசையும் சிறப்பாக அமைந்துள்ளது. ஜதின் சங்கர் ராஜ் மற்றும் சுனில் சி.கே.வின் ஒளிப்பதிவு ரசிக்க வைத்திருக்கிறது.

மொத்தத்தில் ‘ஓடு ராஜா ஓடு’ தேவையில்லாத ஓட்டத்தை குறைத்திருக்கலாம்.

தமிழ் சினிமாவில் அஜித், விஜய், சூர்யா, கமல் என பல முன்னணி நடிகர்களுடன் ஜோடி சேர்ந்து நடித்து உச்சத்தில் இருந்தவர் நடிகை சிம்ரன்.

திருமணத்திற்கு பிறகு தற்போது திரையுலகில் ரீ- என்ட்ரி கொடுத்துள்ளார். ‘ஜோக்கர்’ பட ஹீரோ குரு சோமசுந்தரம், லட்சுமி ப்ரியா இணைந்து நடித்துள்ள ‘ஓடு ராஜா ஓடு’ என்ற படத்தில் சிறப்பு வேடத்தில் நடித்துள்ளார். 

அறிமுக இயக்குனர்களான நிஷாந்த் மற்றும் ஜத்தின் இயக்கியுள்ள இந்த படத்தில் சிம்ரனின் கணவர் தீபக் பக்காவும் இணைந்து நடித்துள்ளார். இவர்களுடன் நாசர், ஆனந்த் சாமி, ஆஷிகா சல்வான், ரவீந்திர விஜய், அபிஷேக், நவீன் பவுல் ஆகியோர் முக்கிய வேடத்தில் நடித்துள்ளனர்.

படத்தின் டிரைலர் சமீபத்தில் வெளியாகி ரசிகர்களிடம் நல்ல வரவேற்பை பெற்று இருந்தது. படத்தின் இயக்குனர்களான நிஷாந்த் எடிட்டிங் பணிகளையும் ஜத்தின் ஒளிப்பதிவு பணிகளையும் சேர்த்து செய்துள்ளனர். டோஸ் நந்தா என்பவர் இசையமைத்துள்ளார். 

குரு சோமசுந்தரம் செட்டாப் பாக்ஸ் வாங்க செல்லும் போது என்ன பிரச்சனைகளை சந்திக்கிறார் என்ற ஒரு நாள் கதையை விறுவிறுப்பும் சுவாரஷ்யமும் குறையாமல் படமாக்கியுள்ளனர். மேலும் இந்த படம் லட்சுமி ப்ரியாவிற்கு முக்கிய படமாக இருக்கும் என எதிர்பார்க்கப்படுகிறது. மேலும் இந்த படம் ஆகஸ்ட் 17-ம் தேதி உலகம் முழுவதும் வெளியாக உள்ளது என்பது குறிப்பிடத்தக்கது.