search icon
என் மலர்tooltip icon

    நீங்கள் தேடியது "ஓடியது"

    சென்னையில் இன்று பஸ்-ரெயில்கள் வழக்கம் போல் ஓடின. பாதுகாப்பு பணிகளில் சுமார் 20 ஆயிரத்துக்கும் மேற்பட்ட போலீசார் ஈடுபடுத்தப்பட்டுள்ளனர். #ThoothukudiFiring #SterliteProtest #DMKBandh
    சென்னை:

    தூத்துக்குடி ஸ்டெர்லைட் ஆலைக்கு எதிராக போராடியவர்கள் மீது போலீசார் நடத்திய துப்பாக்கி சூட்டில் 13 பேர் பலியானார்கள் பலர் படுகாயம் அடைந்துள்ளனர்.

    இந்த படுகொலையை கண்டித்து தமிழகம் முழுவதும் அரசியல் கட்சியினர், மாணவர்கள், தமிழ் ஆர்வலர்கள், பொதுமக்கள் போராட்டத்தில் ஈடுபட்டு வருகின்றனர்.

    இந்த நிலையில் துப்பாக்கி சூட்டை கண்டித்தும் அ.தி.மு.க. அரசு பதவி விலகக் கோரியும் அனைத்துக்கட்சி சார்பில் இன்று முழு அடைப்பு போராட்டம் நடத்த தி.மு.க. செயல்தலைவர் மு.க.ஸ்டாலின் அழைப்பு விடுத்திருந்தார்.



    ஆனாலும் இன்று சென்னையில் பஸ்-ரெயில்கள் வழக்கம் போல் ஓடின. மற்ற மாவட்டங்களில் குறைந்த அளவில் பஸ்கள் இயக்கப்பட்டன. கடைகளை பொறுத்தவரை ஒரு சில கடைகளை தவிர மற்ற கடைகள் அடைக்கப்பட்டிருந்தன.

    சென்னையில் எதிர்க்கட்சிகளை சேர்ந்த போக்குவரத்து கழக தொழிற்சங்கத்தினர் வேலைக்கு செல்லாததால் ஆளும் கட்சியை சேர்ந்த தொழிற்சங்க பிரதிநிதிகள் பஸ்களை இயக்கினார்கள்.

    இதே போல் தொ.மு.ச. சி.ஐ.டி.யூ. உள்ளிட்ட பல்வேறு தொழிற்சங்க ஆட்டோ தொழிலாளர்கள் வேலை நிறுத்தத்தில் பங்கேற்றாலும், தொழிற்சங்கத்தை சாராத மற்ற ஆட்டோ டிரைவர்கள் ஆட்டோக்களை இயக்கினார்கள்.

    கோயம்பேடு மார்க்கெட் தியாகராயநகர், பாரிமுனை உள்பட நகரின் முக்கிய பகுதிகளில் கடைகள் திறந்திருந்தன. ஒரு சில கடைகள் தான் அடைக்கப்பட்டிருந்தன.

    ஓட்டல்கள், டீக்கடைகள், மளிகைகடைகள், செல்போன் கடைகள், பெட்ரோல் பங்குகள் வழக்கம் போல் திறந்திருந்தன.

    நகரின் முக்கிய பகுதிகளில் போலீசார் நிறுத்தப்பட்டு பாதுகாப்பு பணிகளில் ஈடுபட்டனர்.

    தலைமை செயலகம், டி.ஜி.பி. அலுவலகம், மெரீனா கடற்கரை, ரெயில் நிலையங்கள், பஸ் டெப்போக்களில் போலீசார் கூடுதலாக குவிக்கப்பட்டிருந்தனர்.

    கடை வீதிகளிலும் அதிகளவு போலீசார் நிறுத்தப்பட்டிருந்தனர். பாதுகாப்பு பணிகளில் சுமார் 20 ஆயிரத்துக்கும் மேற்பட்ட போலீசார் ஈடுபடுத்தப்பட்டுள்ளனர்.

    பொது வேலை நிறுத்தத்தால் சென்னையில் மக்களின் இயல்பு வாழ்க்கை பெரிய அளவில் பாதிக்கப்படவில்லை. ரெயில்கள் அனைத்தும் வழக்கம் போல் இயங்கின. #ThoothukudiFiring #SterliteProtest #DMKBandh

    ×