நீங்கள் தேடியது "ஒரு நாடு ஒரே தேர்தல்"

புதுடெல்லி:

பாராளுமன்றம் மற்றும் சட்டசபை தேர்தலின் போது ஒலி பெருக்கியை பயன்படுத்தி பிரசாரம் செய்வதற்கு தேர்தல் கமி‌ஷன் கடும் கட்டுப்பாடுகள் விதித்து இருந்தது.

இரவு 10 மணிவரை ஒலி பெருக்கி பிரசாரம் செய்வதால் மாணவர்களின் படிப்பு பாதிக்கப்படுகிறது. பொதுமக்களுக்கும் இடையூறு ஏற்படுவதாக புகார்கள் வந்ததைத் தொடர்ந்து காலை 7 மணி முதல் இரவு 7 மணிவரை மட்டுமே ஒலி பெருக்கி மூலம் பிரசாரம் செய்ய வேண்டும் என்று தேர்தல் கமி‌ஷன் கட்டுப்பாடு விதித்து இருந்தது.

இந்த நிலையில் அரசியல் கட்சிகள் சார்பில் பிரசாரத்துக்கான கட்டுப்பாடுகளை தளர்த்த வேண்டும். குறிப்பாக இரவு 10 மணிவரை ஒலிபெருக்கி பிரசாரத்துக்கு அனுமதிக்க வேண்டும் என்று தேர்தல் கமி‌ஷனுக்கு கோரிக்கை விடுக்கப்பட்டது.

டெல்லியில் நடந்த தேர்தல் கமி‌ஷன் ஆலோசனைக் கூட்டத்திலும் அரசியல் கட்சிகளின் பிரதிநிதிகள் இந்த கோரிக்கையை பல நேரத்தில் வலியுறுத்தினர்.

இதுபற்றி தேர்தல் கமி‌ஷன் அதிகாரிகள் தீவிரமாக ஆலோசனை நடத்தி பரிசீலித்து வந்தனர். இதையடுத்து அரசியல் கட்சிகள் கோரிக்கையை எற்று ஒலிபெருக்கி பிரசார நேரத்தை அதிகரித்து அனுமதி அளித்துள்ளது.

இதுபற்றி டெல்லியில் தேர்தல் கமி‌ஷன் அதிகாரி ஒருவர் கூறியதாவது:-

அரசியல் கட்சி பிரதிநிதிகள் கோரிக்கையை தேர்தல் கமி‌ஷன் பரிசீலித்து ஒலிபெருக்கி பிரசார கட்டுப்பாடுகளை தளர்த்தியுள்ளது. இனி இரவு 10 மணி வரை ஒலிபெருக்கி பிரசாரம் செய்யலாம் என்று அனுமதித்துள்ளது.

இது தொடர்பாக தேர்தல் கமி‌ஷன் பிறப்பித்தது. முந்தைய உத்தரவு வாபஸ் பெறப்படுகிறது.

இவ்வாறு அவர் தெரிவித்தார். #SimultaneousElections #ElectionCommission

புதுடெல்லி:

பாராளுமன்றத்துக்கும் மாநில சட்டசபைகளுக்கும் தனி தனியாக தேர்தல் நடத்துவதால் பல ஆயிரம் கோடி ரூபாய் செலவாகிறது.

இந்த செலவை குறைத்தால் மீதமாகும் பணத்தை பல்வேறு நலத்திட்டப் பணிகளுக்கு செலவிட முடியும் என்று மத்திய அரசு கருதுகிறது.

இதையடுத்து “ஒரு தேசம் ஒரு தேர்தல்” என்ற கொள்கையை கடைபிடிக்க வேண்டும் என்று பாரதிய ஜனதா கட்சி கூறி வருகிறது. அதன் பரிந்துரையை ஏற்று சமீபத்தில் தலைமை தேர்தல் ஆணையம் மிகப்பெரிய ஆய்வை நடத்தியது. அதில் ஒரே நேரத்தில் பாராளுமன்றத்துக்கும், சட்டசபைகளுக்கும் தேர்தல் நடத்தினால் கூடுதலாக எத்தனை லட்சம் மின்னணு ஓட்டுப் பதிவு எந்திரங்கள் தேவைப்படும் என்ற கணக்கீடு செய்யப்பட்டது.

2024-ம் ஆண்டு பாராளுமன்ற தேர்தலில் இருந்து “ஒரு தேசம், ஒரு தேர்தல்” திட்டத்தை நடைமுறைப்படுத்த முடியும் என்று தேர்தல் கமி‌ஷன் கூறியது. ஆனால் இந்த திட்டத்தை இதுவரை பெரும்பாலான கட்சிகள் ஏற்கவில்லை. இதனால் ஒரே நேரத்தில் தேர்தல் திட்டத்துக்கு இது வரை ஒருமித்த கருத்து உருவாகவில்லை.

இந்த நிலையில் பாராளுமன்றத்துக்கு அடுத்த ஆண்டு (2019) ஜூன் மாதம் 3-ந்தேதியுடன் பதவிக் காலம் முடிவதால் ஏப்ரல், மே மாதங்களில் தேர்தல் நடத்த தலைமை தேர்தல் கமி‌ஷன் தயாராகி வருகிறது. ஆனால் அந்த தேர்தலுக்கு முன்னதாக வரும் டிசம்பர் மற்றும் ஜனவரி மாதங்களில் பதவிக் காலம் முடிய உள்ள மிசோராம், சத்தீஸ்கர், மத்திய பிரதேசம், ராஜஸ்தான் ஆகிய 4 மாநிலங்களில் சட்டசபை தேர்தல் நடத்தப்பட வேண்டியதுள்ளது.

இதற்கிடையே பாராளுமன்ற தேர்தலுடன் ஆந்திரா, தெலுங்கானா, அருணா சலபிரதேசம், ஒடிசா, சிக்கிம் ஆகிய 5 மாநிலங்களுக்கும் தேர்தல் நடத்தப்பட உள்ளது. இந்த தேர்தல் முடிந்த அடுத்த 6 மாதத்தில் அரியானா, ஜார்க்கண்ட், மராட்டியம் ஆகிய 3 மாநிலங்களில் தேர்தல் நடத்தப்பட வேண்டும்.

இந்த ஆண்டு டிசம்பர் மாதம் தொடங்கி அடுத்த ஆண்டு நவம்பர் மாதம் வரை 11 மாதங்களில் 12 மாநிலங்களுக்கு 3 கட்டமாக தேர்தல் நடத்தப்பட வேண்டும். இதனால் அரசுக்கு கூடுதல் செலவு ஏற்படும் இந்த செலவை குறைக்க பாராளுமன்ற தேர்தலுடன் 11 மாநிலங்களுக்கு ஒரே நேரத்தில் தேர்தல் நடத்தலாம் என்று பாரதிய ஜனதா கட்சி பரிந்துரைத்துள்ளது.

“ஒரு தேசம் ஒரு தேர்தல்” திட்டத்தின் முதல்படியாக பாராளுமன்ற தேர்தலுடன் 11 மாநில சட்டசபைகளுக்கும் தேர்தல் நடத்தி விட வேண்டும் என்பதில் பிரதமர் மோடி தீவிரமாக இருப்பதாக கூறப்படுகிறது. இதைத் தொடர்ந்து தேர்தல் ஆணையமும் பாராளுமன்ற தேர்தலுடன் 11 மாநில சட்ட சபைக்கு ஒரே நேரத்தில் தேர்தல் நடத்த தன்னை தயார்படுத்தி வருகிறது.

இந்த ஆண்டு இறுதியில் தேர்தல் நடத்த திட்டமிட்டுள்ள மிசோரம், சத்தீஸ்கர், மத்திய பிரதேசம், ராஜஸ்தான் ஆகிய 4 மாநிலங்களில் இப்போதே பா.ஜ.க., காங்கிரஸ் கட்சியினர் பிரசாரம் தொடங்கி விட்டனர். பாராளுமன்ற தேர்தலுடன் இந்த 4 மாநிலங்களுக்கும் தேர்தல் நடத்த வேண்டுமானால் இந்த 4 மாநிலங்களிலும் டிசம்பர் மாதத்துக்கு பிறகு ஜனாதிபதி ஆட்சியை அமல்படுத்த வேண்டியதிருக்கும்.

அது போல அரியானா, ஜார்க்கண்ட், மராட்டியம் ஆகிய 3 மாநிலங்களிலும் 6 மாதத்துக்கு முன்பே ஆட்சியை கலைத்து விட்டு, முன்பே தேர்தல் நடத்த வேண்டும். இந்த 3 மாநிலங்களிலும் பா.ஜ.க. ஆட்சி நடப்பதால், முன் கூட்டியே தேர்தல் நடத்துவதற்கு வசதியாக எளிதில் ஆட்சியை கலைக்க முடியும்.

ஆனால் காங்கிரஸ் உள்பட எதிர்க்கட்சிகள் இந்த திட்டத்துக்கு இதுவரை சம்மதம் தெரிவிக்கவில்லை.

இதற்கிடையே பாராளுமன்ற தேர்தலுடன் ஆந்திரா, அருணாசல பிரதேசம், ஒடிசா, சிக்கிம், தெலுங்கானா ஆகிய 5 மாநிலங்களுக்கும் சட்டசபை தேர்தல் நடத்துவதற்கான ஏற்பாடுகளை தேர்தல் ஆணையம் செய்யத் தொடங்கியுள்ளது. இதற்காக 17 லட்சத்து 40 ஆயிரம் மின்னணு எந்திரங்களுக்கு தேர்தல் ஆணையம் ஆர்டர் கொடுத்துள்ளது. இன்னும் 3 மாதங்களில் அவை தயாராகி வந்து விடும்.

பாராளுமன்றத்துக்கும் அனைத்து மாநில சட்ட சபைகளுக்கும் ஒரே நேரத்தில் தேர்தல் நடத்தப்பட வேண்டுமானால் சுமார் 80 லட்சம் எந்திரங்கள் தேவைப்படும். 11 மாநில சட்டசபைக்கும், பாராளுமன்றத்துக்கும் ஒரே நேரத்தில் தேர்தல் நடத்த வேண்டுமானால் சிறிதளவு கூடுதல் எந்திரங்களை வர வழைத்து ஓட்டுப்பதிவை நடத்தி விட முடியும் என்று தேர்தல் ஆணையம் கூறியுள்ளது.

ஆனால் இவையெல்லாம் பரிந்துரை செய்யப்பட்ட நிலையிலேயே உள்ளன. அனைத்துக் கட்சிகளும் ஒருமித்த மனதுடன் முன் வந்தால் மட்டுமே “ஒரு தேசம் ஒரு தேர்தல்” திட்டம் வெற்றி பெறும்.

புதுடெல்லி:

தேர்தல் செலவினங்களை குறைக்கவும், அடிக்கடி தேர்தல் நடைபெறுவதை தவிர்க்கவும் பாராளுமன்ற தேர்தலுடன் சேர்த்து சட்டசபைகளுக்கும் ஒரே நேரத்தில் தேர்தல் நடத்தலாமா என்று மத்திய அரசு ஆலோசனை நடத்தி வருகிறது.

இதற்கு தேர்தல் கமி‌ஷன் வரவேற்பு தெரிவித்ததுடன் ஒரே நேரத்தில் தேர்தல் நடத்த தயார் என்று அறிவித்தது. இது தொடர்பாக அரசியல் கட்சி தலைவர்களின் கருத்துக்களை கேட்டு வருகிறது.

இதற்கிடையே மத்திய சட்ட கமி‌ஷனும் ஒரே நேரத்தில் தேர்தல் நடத்துவது சாத்தியமா? இதில் உள்ள இடர்பாடுகள் என்ன என்பது குறித்தும் அனைத்து கட்சி தலைவர்கள் கூட்டத்தை கூட்டி கருத்து கேட்டது. இதில் கட்சிகள் சார்பில் பிரதிநிதிகள் கலந்து கொண்டு கருத்துக்களை தெரிவித்தனர். ஒரே நேரத்தில் தேர்தல் நடத்த பரவலாக ஆதரவும், எதிர்ப்பும் ஏற்பட்டுள்ளது.

காங்கிரஸ் சார்பில் இது தொடர்பாக ஆலோசனை நடத்தி கருத்துக்களை தெரிவிக்க குழு அமைக்கப்பட்டது. இந்த குழுவில் மூத்த காங்கிரஸ் தலைவர்கள் மல்லிகார்ஜூன கார்கே, ப.சிதம்பரம், கபில்சிபல், அபிஷேக் சிங்வி, ஆனந்த் சர்மா, ஜெ.டி.சீலம் ஆகியோர் இடம் பெற்று இருந்தனர்.

இந்த குழு ஆலோசனை நடத்தியதில் பாராளுமன்றத்துக்கும், சட்டமன்றத்துக்கும் ஒரே நேரத்தில் தேர்தல் நடத்துவது சாத்தியம் இல்லை என்று முடிவு எடுக்கப்பட்டது. இதையடுத்து அவர்கள் டெல்லியில் சட்ட கமி‌ஷனை நேரில் சந்தித்து ஒரே நேரத்தில் தேர்தல் நடத்துவது இந்திய கூட்டாட்சி தத்துவத்துக்கும் ஜனநாயக நெறிமுறைகளுக்கும் எதிரானது. எனவே காங்கிரஸ் எதிர்ப்பு தெரிவிப்பதாக கூறி தங்கள் கருத்துக்களை பதிவு செய்தனர்.

பா.ஜனதா சார்பில் கருத்துக்களை தெரிவிக்க மேலும் கால அவகாசம் கேட்கப்பட்டுள்ளது. பா.ஜனதா கூட்டணி கட்சிகளிடையேயும் இதில் கருத்து வேறுபாடு உள்ளது. அகாலி தளம் மற்றும் தெலுங்கானா ராஷ்டிரிய சமிதி, சமாஜ்வாடி ஆகிய கட்சிகள் ஆதரவு தெரிவித்துள்ளன.

அ.தி.மு.க. ஒரே நேரத்தில் தேர்தல் நடத்த ஆதரவு தெரிவித்தாலும் 2025-ம் ஆண்டில் இருந்து இதை அமல்படுத்த வேண்டும் என்று கருத்து தெரிவித்துள்ளது.

திரிணாமுல் காங்கிரஸ், ஆம்ஆத்மி, தி.மு.க., தெலுங்கு தேசம், இடது சாரிகள், ஜெ.டி.எஸ். ஆகிய கட்சிகள் ஒரே நேரத்தில் தேர்தல் நடத்த எதிர்ப்பு தெரிவித்துள்ளன.

புதுடெல்லி:

பாராளுமன்றத்துக்கு அடுத்த ஆண்டு (2019) தேர்தல் நடத்தப்படும் போது மாநில சட்டசபைகளுக்கும் சேர்த்து தேர்தல் நடத்த மத்தியில் ஆளும் பா.ஜ.க. விரும்புகிறது.

இது தொடர்பாக மத்திய சட்ட ஆணையம் கடந்த வாரம் அங்கீகரிக்கப்பட்ட அரசியல் கட்சிகளிடம் கருத்து கேட்டது. அப்போது 4 கட்சிகள் மட்டுமே ஒரே நேரத்தில் தேர்தல் நடத்தும் திட்டத்துக்கு ஆதரவு தெரிவித்தன. 11 கட்சிகள் எதிர்ப்பு தெரிவித்தன.

இந்த நிலையில் சட்ட ஆணையத்துக்கு தலைமை தேர்தல் ஆணையமும் பதில் அளித்துள்ளது. அதில் பாராளுமன்றத்துக்கும், மாநில சட்டசபைகளுக்கும் ஒரே நேரத்தில் தேர்தல் நடத்தப்பட என்னென்ன செய்ய வேண்டும், எவ்வளவு செலவாகும் என்பன போன்ற விபரங்கள் விரிவாக தெரிவிக்கப்பட்டுள்ளன.

குறிப்பாக ஓட்டுப்பதிவு நடத்த ஒவ்வொரு வாக்குச் சாவடிக்கும் 2 மடங்கு மின்னணு ஓட்டுப்பதிவு எந்திரங்கள் தேவைப்படும் என்று கூறப்பட்டுள்ளது. ஓட்டுச்சாவடி அதிகாரிகள், ஊழியர்களுக்கு கூடுதல் பயிற்சி அளிக்க கால அவகாசம் தேவைப்படும். அதற்கும் கணிசமான தொகை செலவாகும்.

ஒரே நேரத்தில் தேர்தல் நடத்தப்பட வேண்டுமானால் கூடுதலாக பல லட்சம் எந்திரங்கள் வாங்கப்பட வேண்டும். அப்படி கூடுதலாக மின்னணு எந்திரங்கள் வாங்குவதற்கு மட்டும் சுமார் ரூ.5 ஆயிரம் கோடி தேவைப்படும் என்று தலைமை தேர்தல் ஆணையம் தனது பதிலில் சுட்டிக்காட்டியுள்ளது.

பொதுவாக மின்னணு ஓட்டுப்பதிவு எந்திரங்களை 3 தேர்தலுக்குத்தான் பயன்படுத்த முடியும். அதன் பிறகு புதிய எந்திரங்கள் வாங்க வேண்டும். எனவே 15 ஆண்டுகளுக்கு ஒரு தடவை எந்திரங்களுக்கே சில ஆயிரம் கோடி ரூபாய் தேவைப்படும்.

மேலும் வரும் ஆண்டுகளில் ஓட்டுச்சாவடிகள் எண்ணிக்கை அதிகரிக்கப்பட உள்ளது. எனவே மின்னணு எந்திரங்கள் தேவை அதிகரிக்கும். அதற்கும் கூடுதல் செலவாகும்.

2024-ம் ஆண்டு தேர்தலின் போது மக்கள் தொகை அதிகரிப்பு காரணமாக கூடுதலாக 12 லட்சம் ஓட்டுச்சாவடிகள் அமைக்க வேண்டியதிருக்கும். அப்போது மின்னணு ஓட்டுப் பதிவு எந்திரங்கள் வாங்குவதற்கே சுமார் ரூ.14 ஆயிரம் கோடி தேவைப்படும் என்று சட்ட ஆணையத்திடம் தேர்தல் ஆணையம் தெரிவித்துள்ளது.