புதியம்புத்தூர்:
புதியம்புத்தூர்- புதுக்கோட்டை ரோட்டில் உள்ள ஊராட்சி குப்பை கிடங்கு அருகே கால்நடை ஆஸ்பத்திரி, ஊராட்சி மன்றம், அரசு ஆரம்ப சுகாதார நிலையம், சுய உதவி குழு கட்டிடம் போன்ற அரசு அலுவலகங்கள் உள்ளது.
நேற்று மாலை இந்த குப்பை கிடங்கில் தீப்பிடித்து பயங்கர புகைமூட்டம் ஏற்பட்டது. இதனால் ரோட்டில் வாகனங்கள் செல்ல முடியவில்லை. ஆஸ்பத்திரி மற்றும் அரசு அலுவலகங்களுக்கு வரும் பொதுமக்கள் பாதிப்படைந்தனர்.
அப்போது இந்த வழியில் வந்த சண்முகையா எம்.எல்.ஏ. தீ மூட்டத்தை பார்த்து ஓட்டப்பிடாரம் வட்டார வளர்ச்சி அலுவலரிடம் பேசினார். குப்பை கிடங்கை வேறு இடத்திற்கு மாற்ற கூறினார். ஊராட்சிக்கு சொந்தமான ஒரு ஏக்கர் கசிவு நீர் குட்டை இடம் புதுக்கோட்டை ரோட்டில் உள்ளது.
இந்த இடத்திற்கு அருகில் குடியிருப்புகள் இல்லை. எனவே குப்பை கிடங்கை இந்த இடத்திற்கு மாற்றலாம் என பொதுமக்கள் தெரிவித்தனர். எனவே போர்க்கால அடிப்படையில் குப்பைக் கிடங்கை இடமாற்றம் செய்ய வேண்டும் என்று பொதுமக்கள் தெரிவிக்கின்றனர்.
சம்பவ இடத்துக்கு தீயணைப்புத்துறையினர் உடனடியாக வந்து போராடி தீயை அணைத்தனர்.
