திருவள்ளூர்:
திருவள்ளூர் கலெக்டர் அலுவலக வளாகத்தில் சமூக நலத்துறை சார்பில் நலத்திட்ட உதவிகள் வழங்கும் விழா நடைபெற்றது.
இதில் அமைச்சர் பெஞ்சமின், எம்.எல்.ஏ.க்கள் கோ.அரி, ஏழுமலை, சிறுணியம் பலராமன், நரசிம்மன், மாவட்ட கலெக்டர் சுந்தரவல்லி உள்ளிட்ட அதிகாரிகள் கலந்து கொண்டனர்.
அப்போது மண்எண்ணை கேனுடன் வாலிபர் ஒருவர் வேகமாக ஓடி வந்தார். திடீரென அவர் தனது உடலில் மண்எண்ணையை ஊற்றி தீக்குளிக்க முயன்றார். இதனால் அங்கு பரபரப்பு ஏற்பட்டது.
இதனை பார்த்து அதிர்ச்சி அடைந்த பாதுகாப்புக்கு நின்ற போலீசார் வாலிபரை தடுத்து நிறுத்தி மடக்கி பிடித்தனர். விசாரணையில் அவர் திருவள்ளூரை அடுத்த விடையூரைச் சேர்ந்த கர்னல் குமார் என்பது தெரிந்தது.
கர்னல்குமார், நெமிலி அகரத்தைச் சேர்ந்த திவ்யா என்பவரை காதலித்து கலப்பு திருமணம் செய்து உள்ளார்.
சில மாதங்களுக்கு முன்பு திவ்யாவை அவரது பெற்றோர் மற்றும் உறவினர்கள் அழைத்து சென்று விட்டனர். பின்னர் அவரை அனுப்பவில்லை.
இதுகுறித்து கர்னல் குமார் போலீசில் புகார் செய்தும் நடவடிக்கை எடுக்கவில்லை. இதனால் மனவேதனை அடைந்த அவர் தற்கொலைக்கு முயன்றது தெரிய வந்தது. இது தொடர்பாக விசாரணை நடத்த போலீசாருக்கு அதிகாரிகள் உத்தரவிட்டு உள்ளனர். அமைச்சர் பங்கேற்ற விழாவில் வாலிபர் தற்கொலைக்கு முயன்ற சம்பவம் திருவள்ளூரில் பரபரப்பை ஏற்படுத்தி உள்ளது.
