மேட்டுப்பாளையம்:
மேட்டுப்பாளையம் நகராட்சிக்கான உள்ளாட்சி தேர்தல் வருகிற 17-ந் தேதி நடக்கிறது. நகராட்சி தேர்தலுக்கான வேட்பு மனு தாக்கல் கடந்த 26-ந் தேதி தொடங்கியது. இதுவரை 84 பேர் வேட்பு மனு தாக்கல் செய்துள்ளனர். இன்று (3-ந் தேதி) மனு தாக்கல் செய்ய கடைசி நாளாகும்.
இந்த நிலையில் நகராட்சி தேர்தலுக்கான தி.மு.க. வேட்பாளர்கள் பட்டியல் இதுவரை வெளியிடப்படவில்லை. மேலும் கூட்டணி கட்சிகளுக்கு எந்தெந்த வார்டு ஒதுக்கப்பட்டுள்ளது என்றும் அறிவிப்பு செய்யப்படவில்லை. இதனால் தி.மு.க. மற்றும் கூட்டணி கட்சிகள் நிர்வாகிகளிடையே குழப்பம் ஏற்பட்டுள்ளது.
இதற்கிடையே தி.மு.க. மாவட்ட செயலாளர் ராமச்சந்திரன், மாவட்ட நகர நிர்வாகிகளுடன் ஆலோசனை செய்யாமல் வேட்பாளர்களை தன்னிச்சையாக தேர்வு செய்து வருவதாக தி.மு.க.வினர் குற்றம் சாட்டி வருகிறார்கள்.
இந்த நிலையில் மாவட்ட சிறுபான்மை பிரிவு துணை அமைப்பாளர் பி.டி.பாபு தலைமையில் நகர நிர்வாகிகள் நேற்று இரவு மேட்டுப்பாளையம் அவுசிங் யூனிட்டில் உள்ள மாவட்ட செயலாளர் ராமச்சந்திரன் வீடு மற்றும் அலுவலகம் முன்பு திடீர் முற்றுகை போராட்டத்தில் ஈடுபட்டனர். இதனால் அங்கு பரபரப்பு ஏற்பட்டது.
இதைதொடர்ந்து தி.மு.க. நிர்வாகி ஒருவர் கூறும் போது,‘‘ஒருசில வார்டுகளில் பிரச்சினைகள் இருந்து வருவதால் வேட்பாளர் பட்டியல் அறிவிக்கப்படவில்லை. எனினும் இன்று (3-ந் தேதி) காலைக்குள் அறிவிக்கப்பட்டு விடும்’’ என்று தெரிவித்தார்.
