கொல்கத்தா:
மேற்கு வங்காளத்தில் இன்று 6-வது கட்ட வாக்குப்பதிவு நடைபெற்று வருகிறது. மாநிலத்தின் வடக்கு 24 பர்கானாக்கள், நாடியா, கிழக்கு பர்தமான், உத்தர் தினாஜ்பூர் ஆகிய 4 மாவட்டங்களை சேர்ந்த 43 தொகுதிகளில் வாக்குப்பதிவு நடைபெறுகிறது. மொத்தம் 14,480 வாக்குச்சாவடிகள் அமைக்கப்பட்டு உள்ளன. 306 வேட்பாளர்களின் அரசியல் எதிர்காலத்தை நிர்ணயிக்கும் இந்த தேர்தலில் வாக்காளர்கள் காலை முதலே ஆர்வமாக வாக்களித்துவருகின்றனர்.
காலை 9.30 மணி நிலவரப்படி 17 சதவீத வாக்குகள் பதிவாகியிருந்தன. 11.30 மணி நிலவரப்படி 37.27 சதவீத வாக்குகள் பதிவாகியிருந்தன. தொடர்ந்து விறுவிறுப்பாக வாக்குப்பதிவு நடைபெறுகிறது.
இதுவரை இல்லாத அளவிற்கு தினசரி கொரோனா பாதிப்பு அதிகரித்து வரும் சூழ்நிலையில், 6ம் கட்ட வாக்குப்பதிவு நடைபெறுகிறது. இதனால் வாக்குச்சாவடிகளில் கொரோனா தடுப்பு விதிமுறைகளை பொதுமக்கள் பின்பற்றும்படி அறிவுறுத்தப்பட்டுள்ளது.
கொரோனா அதிகரிப்பதால் அடுத்தகட்ட தேர்தல்களை ஒரே நாளில் நடத்தும்படி திரிணாமுல் காங்கிரஸ் கோரிக்கை விடுத்தது. ஆனால், அதனை தேர்தல் ஆணையம் ஏற்கவில்லை.
