மும்பை:
மராட்டிய மாநிலம் நாக்பூர் காம்டி அரசு ஆஸ்பத்திரியில் 42 வயது நர்ஸ் வேலை பார்த்து வருகிறார். இவர் கடந்த ஜனவரி 16-ந் தேதி, முதல் டோஸ் கொரோனா தடுப்பு மருந்தை போட்டுக்கொண்டார். பின்னர் பிப்ரவரி 18-ந் தேதி 2-வது டோஸ் தடுப்பு மருந்தும் நர்சுக்கு செலுத்தப்பட்டது. இந்தநிலையில் நர்ஸ் மற்றும் அவரது குடும்பத்தினருக்கு தொற்று அறிகுறிகள் தெரிந்தது.
எனவே மார்ச் 2-ந் தேதி அவர்களுக்கு ஆண்டிஜன் முறையில் பரிசோதனை மேற்கொள்ளப்பட்டது. அப்போது அவர்களுக்கு தொற்று இருப்பது கண்டறியப்பட்டது. இதையடுத்து நர்ஸ் வீட்டில் தனிமைப்படுத்தப்பட்டார்.
நேற்றுமுன்தினம் நர்சு மற்றும் குடும்பத்தை சேர்ந்த 3 பேருக்கு ஆர்.டி.-பி.சி.ஆர். முறையில் சோதனை மேற்கொள்ளப்பட்டது. அதிலும் அவர்களுக்கு கொரோனா தொற்று இருப்பது உறுதியானது. 2-வது டோஸ் தடுப்பூசி போட்டுக்கொண்ட பிறகும் நர்ஸ் ஒருவருக்கு கொரோனா தொற்று உறுதி செய்யப்பட்டு இருப்பது அதிர்ச்சியை ஏற்படுத்தி உள்ளது.
