புதுடெல்லி:
இந்தியாவில் கொரோனா வைரஸ் தொற்றால் பாதிக்கப்பட்டவர்களின் மொத்த எண்ணிக்கை 78.64 லட்சமாக உயர்ந்துள்ளது. இதில் 90 சதவீத நோயாளிகள் குணமடைந்துள்ளனர். இது கொரோனா தடுப்பு நடவடிக்கையில் புதிய சாதனையாக கருதப்படுகிறது. தினமும் 50 ஆயிரத்திற்கும் அதிகமானோருக்கு தொற்று உறுதி செய்யப்பட்டாலும், அதைவிட அதிக நபர்கள் குணமடைகின்றனர்.
அதேபோல் உயிரிழப்பும் கணிசமாக குறைந்து வருகிறது. தினமும் ஆயிரத்திற்கும் அதிகமான நபர்கள் உயிரிழந்த நிலையில், கடந்த ஒரு வாரமாக உயிரிழப்பு எண்ணிக்கை 1000-க்கு கீழ் குறைந்துள்ளது. அக்டோபர் 2ம் தேதி முதல் தினசரி 1100க்கும் குறைவான மரணங்கள் பதிவாகி உள்ளன. நேற்று 578 பேர் மரணம் அடைந்துள்ளனர்.
குணமடைந்தவர்களின் எண்ணிக்கைக்கும், சிகிச்சையில் உள்ளவர்களின் எண்ணிக்கைக்கும் உள்ள இடைவெளியானது 64 லட்சத்தை கடந்துள்ளது. இன்றைய நிலவரப்படி மொத்த பாதிப்பு எண்ணிக்கையில் 8.50 சதவீதம் சிகிச்சையில் உள்ளனர். அதாவது, நாடு முழுவதிலும் உள்ள பல்வேறு மருத்துவமனைகளில் 6,68,154 பேர் சிகிச்சை பெற்றுவருவதாக மத்திய சுகாதாரத்துறை தெரிவித்துள்ளது.
