மும்பை:
மராட்டிய மாநிலம் பால்கர் மாவட்டம் நாலசோப்ராவில் உள்ள பபுல் பாடாவை சேர்ந்தவர் கைலாஷ் பர்மார்(வயது35). இவரை விட்டு கடந்த 1½ மாதங்களுக்கு முன்பு மனைவி பிரிந்து சென்றுவிட்டார். கைலாஷ் பர்மார் தனது 12 வயது மகன், 8 மற்றும் 3 வயது மகள்களுடன் வசித்து வந்தார். இந்தநிலையில் நேற்று முன்தினம் இரவு பூட்டிய வீட்டுக்குள் கைலாஷ் பர்மார் தனது குழந்தைகள் 3 பேரையும் கத்தியால் கழுத்தை அறுத்து கொலை செய்து, அதே கத்தியால் தானும் கழுத்தை அறுத்து தற்கொலை செய்து கொண்டார். இதுபற்றி தகவல் அறிந்து விரைந்து வந்த போலீசார் 3 குழந்தைகள் உள்பட 4 பேரின் உடல்களையும் மீட்டு பிரேத பரிசோதனைக்காக ஆஸ்பத்திரிக்கு அனுப்பி வைத்தனர்.
பிரிந்து சென்ற தனது மனைவியின் படம் வேறு ஒருவரின் பேஸ்புக் பக்கத்தில் இருந்ததை கண்டு விரக்தி அடைந்ததால், 3 குழந்தைகளை கொடூரமாக கொன்று கைலாஷ் பர்மாரும் தற்கொலை செய்து கொண்டது போலீசாரின் முதற்கட்ட விசாரணையில் தெரியவந்தது. இதுகுறித்து போலீசார் வழக்குப்பதிவு செய்து தொடர்ந்து விசாரணை நடத்தி வருகின்றனர்.
