பொருளாதார வளர்ச்சியில் ஏற்பட்ட மந்தநிலை, ரூபாய் மதிப்பு சரிவு உள்ளிட்ட காரணங்களால் இந்தியாவில் தங்கத்தின் விலை தொடர்ந்து உயர்ந்து வருகிறது. குறிப்பாக ஒரு மாத இடைவெளியில் தங்கம் விலை சவரனுக்கு ரூ.2 ஆயிரத்துக்கு மேல் அதிகரித்து இருக்கிறது. இடையில் அவ்வப்போது சற்று விலை குறைந்து இருந்தாலும், மறுநாளிலேயே ராக்கெட் வேகத்தில் உயர்ந்து விடுகிறது.
இதன் காரணமாக நகை கடைகளில் கூட்டமின்றி வெறிச்சோடி காணப்படுவதாக சமூக வலைதளங்களில் செய்திகள் பரவிய வண்ணம் உள்ளன. அந்த வகையில், டெல்லியில் உள்ள நகைக்கடை ஒன்றில் வாடிக்கையாளர்கள் யாரும் வராததால் ஊழியர்கள் உற்சாகமாக நடனமாடுவதாக குறிப்பிட்டு, வீடியோ ஒன்று சமூக வலைதளங்களில் வைரலாக பரவி வருகிறது.
அதன் உண்மை தன்மை குறித்து ஆய்வு செய்ததில் அது போலி என கண்டறியப்பட்டுள்ளது. அந்த வீடியோ டெல்லியில் உள்ள பிரபல நகைக்கடையில் கடந்த வருடம் எடுக்கப்பட்டது என தெரியவந்துள்ளது. தினமும் பாடல் பாடி, நடனம் ஆடி வேலையை தொடங்குவதை வழக்கமாக கொண்டு, அதனை தினமும் கடைபிடித்து வருகின்றனர்.
இதுபோன்று சமூக வலைத்தளங்களில் வைரலாகும் வீடியோக்களை நம்பி, அவற்றை பகிர்ந்து கொள்வதை தவிர்ப்பதே நல்லது. ஒருவேளை பகிர நினைப்போர் அவற்றின் உண்மைத்தன்மையை ஆய்வு செய்து, பின் அவற்றை பகிர்ந்து கொள்வது வீண் குழப்பத்தை தவிர்க்க உதவும்.
போலி செய்திகளால் பலர் பாதிக்கப்பட்டுள்ளனர். சிலர் போலி செய்தியின் பாதிப்பால் உயிரிழந்த சம்பவங்களும் அரங்கேறியிருக்கிறது. சமூக வலைத்தளத்தில் ஒரு தகவலை பகிர்ந்து கொள்ளும் முன் அதன் உண்மைத்தன்மையை அறிந்து கொள்வது வீண் பதற்றத்தை தவிர்க்க உதவும்.
