வெளிநாட்டு சிறைகளில் 8,189 இந்திய கைதிகள் - மாநிலங்களவையில் தகவல்

புதுடெல்லி:

வெளிநாடுகளில் உள்ள சிறைகளில் கடந்த மே 31-ந் தேதி நிலவரப்படி, 8 ஆயிரத்து 189 இந்திய கைதிகள் இருப்பதாக மத்திய வெளியுறவுத்துறை இணை மந்திரி வி.முரளீதரன் பாராளுமன்ற மாநிலங்களவையில் தெரிவித்தார்.

“இவர்களில் விசாரணை கைதிகளும் அடங்குவர். அதிகஅளவாக, சவுதி அரேபிய சிறைகளில் ஆயிரத்து 811 இந்திய கைதிகள் உள்ளனர். இந்த இந்திய கைதிகளுக்கு பொது மன்னிப்பு அல்லது தண்டனை குறைப்பை பெற்றுத்தர தூதரகங்கள் மூலம் மத்திய அரசு நடவடிக்கை எடுத்து வருகிறது.

கடந்த 2016-ம் ஆண்டில் இருந்து இப்போதுவரை, வளைகுடா நாடுகளில் 3 ஆயிரத்துக்கு மேற்பட்ட இந்திய கைதிகளுக்கு பொது மன்னிப்பு அல்லது தண்டனை குறைப்பு கிடைத்திருக்கிறது” என்றும் வி.முரளீதரன் கூறினார்.