மும்பை: 128 பேருடன் இன்று தரையிறங்கும்போது ஏர் இந்தியா விமானத்தின் டயர் வெடித்தது

மும்பை:

குஜராத் மாநில தலைநகரான அகமதாபாத்தில் இருந்து மும்பை நகருக்கு வந்த ஏர் இந்தியா நிறுவனத்துக்கு சொந்தமான தடம் எண்: 614 கொண்ட A320 ரக ஏர்பஸ் விமானம் விமானிகள், பணியாளர்கள், பயணிகள் உள்பட 128 பேருடன் இன்று காலை 9.04 மணியளவில் சத்ரபதி சிவாஜி விமான நிலையத்தில் தரையிறங்கியது.

அப்போது, அவ்விமானத்தின் டயர்களில் ஒன்று பயங்கர சப்தத்துடன் வெடித்து, சிதறியது. டயர் வெடித்த அதிர்ச்சியை உணர்ந்த பயணிகள் பீதியடைந்தனர். எனினும், ஓடுபாதையில் ஊர்ந்துசென்ற விமானம் எவ்வித ஆபத்துமின்றி வழக்கமான நிறுத்துமிடத்திற்கு வந்து சேர்ந்ததாகவும், பயணிகள் அனைவரும் பத்திரமாக இறங்கியதாகவும் ஏர் இந்தியா நிறுவனத்தின் செய்தி தொடர்பாளர் தெரிவித்துள்ளார்.

மும்பையில் இருந்து தடம் எண்: 651 ஆக ராய்பூருக்கு புறப்பட்டு செல்லவேண்டிய இந்த விமானத்துக்கு பதிலாக மாற்று விமானம் ஏற்பாடு செய்யப்பட்டதாகவும் அவர் குறிப்பிட்டார்.


கோப்பு படம்