டெல்லியில் 90 பேர் டெங்கு காய்ச்சலால் பாதிப்பு: ஒரு வாரத்தில் மட்டும் 40 பேர் மருத்துவமனையில் அனுமதி

புதுடெல்லி:

ஆண்டுதோறும் மழை காலம் வரும் பொழுதெல்லாம் பல்வேறு வகையாக காய்ச்சல் நோயால் மக்கள் பாதிக்கப்படுவது வழக்கம். தற்போது டெங்கு காய்ச்சல் அதிக அளவில் மக்களை பாதிக்கின்றது.

தலைநகர் புதுடெல்லியில் இந்த சீசனில் 90 பேர் டெங்கு காய்ச்சலால் பாதிக்கப்பட்டுள்ளனர். அதில் கடந்த வாரத்தில் மட்டும் 40 பேர் மருத்துவமனையில் அனுமதிக்கப்பட்டுள்ளனர்.

டெல்லி மாநகராட்சி வெளியிட்டுள்ள அறிக்கையில் இந்த தகவல்கள் வெளியாகியுள்ளன.

கடந்த ஆண்டு மட்டும் டெல்லியில் 15 ஆயிரத்து 867 பேர் டெங்கு நோயால் பாதிக்கப்பட்டனர். இது கடந்த 20 வருடங்களில் மிகப்பெரிய பாதிப்பாகும். அதில் 60 பேர் உயிரிழந்தனர்.

டெங்கு நோய் பாதிப்பிற்காக மத்திய சுகாதாரத் துறை பல்வேறு நடவடிக்கைகளை மேற்கொண்டு வருகின்றது. தனியாக மருத்துவமனை வார்டுகளை ஒதுக்கி டெங்கு நோயாளிக்கு அங்கு சிகிச்சை அளிக்கப்பட்டு வருகிறது.