திருச்சி,
பாப்புலர் ப்ரண்ட் ஆப் இந்தியா அமைப்பின் தேசிய தலைவர் சலாவுதீன் உள்ளிட்ட தேசிய பொறுப்பாளர்கள் என்.ஐ.ஏ. அதிகாரிகளால் கைது செய்யப்பட்டனர். மேலும் மாநில, மாவட்ட நிர்வாகிகள் அலுவலகங்கள் மற்றும் வீடுகளில் என்.ஐ.ஏ. மற்றும் அமலாக்கத்துறையினர் சோதனை நடத்தி வருகிறார்கள்.
இதனை கண்டித்து இன்று காலை திருச்சி பாலக்கரை பகுதியில் பாப்புலர் பிரண் ட்இந்தியா அமைப்பினர் தடையை மீறி ஆர்ப்பாட்டத்தில் ஈடுபட்டனர். ஆர்ப்பாட்டம் நடந்து கொண்டிருந்தபோது திடீரென ஓடிச் சென்று கொளுத்தும் வெயிலில் சாலையில் அமர்ந்தும், படுத்தும் மறியலில் ஈடுபட்டனர்.
இதனால் ஜங்ஷன் பகுதியில் இருந்து காந்தி மார்க்கெட்டுக்கு சென்ற அனைத்து வாகனங்களும் பாலத்தில் அணிவகுத்து நின்றன. சுமார் அரை மணி நேரத்திற்கும் மேலாக அந்த பகுதியில் போக்குவரத்து கடுமையாக பாதிக்கப்பட்டது.
இதையடுத்து உதவி போலீஸ் கமிஷனர் சுந்தரமூர்த்தி மற்றும் பாலக்கரை இன்ஸ்பெக்டர் நிக்சன் தலைமையிலான போலீசார் போராட்டக்காரர்களை குண்டு கட்டாக தூக்கி கைது செய்தனர். இதில் பாப்புலர் பிரண்ட் ஆப் இந்தியா அமைப்பின் மண்டல தலைவர் அமீர் பாஷா, மாவட்ட தலைவர் சபியுல்லா, மாவட்ட செயலாளர் அப்சல் உள்ளிட்ட 30-க்கு மேற்பட்ட நிர்வாகிகள் கைது செய்யப்பட்டனர். இந்த திடீர் சாலை மறியல் போராட்டம் பாலக்கரை பகுதியில் சிறிது நேரம் பெரும் பரபரப்பை ஏற்படுத்தியது.
