கே.கே.நகர்,
திருச்சி விமான நிலையத்தில் இருந்து வெளிநாடுகளுக்கு விமாங்கள் இயக்கப்பட்டு வருகிறது. இந்த விமானங்களில் தங்கம் கடத்தி வரும் சம்பவங்கள் சமீப காலாமாக அதிகரித்துள்ளது. குறிப்பாக துபாய், மலேசியா, சிங்கப்பூர் உள்ளிட்ட நாடுகளில் இருந்து வரும் பயணிகள் அதிக அளவில் தங்கத்தை கடத்தி வருகின்றனர்.இதே போல் திருச்சியில் இருந்து செல்லும் பயணிகள் வெளிநாட்டு கரன்சி, அமெரிக்க டாலர், அரிய வகை உயிரினங்கள் ஆகியவற்றை கடத்தி செல்வதற்காக எடுத்து வருகின்றனர்.இதனை தடுக்கும் வகையில் சுங்கத்துறை அதிகாரிகளும், மத்திய வருவாய் நுண்ணறிவு பிரிவு அதிகாரிகளும் தொடர் நடவடிக்கை எடுத்து வருகின்றனர்.இந்த நிலையில் இன்று திருச்சியிலிருந்து சிங்கப்பூருக்கு ஸ்கூட் விமானம் புறப்பட தயாராக இருந்தது. இதில் பயணம் செய்யும் பயணிகளை மத்திய வருவாய் நண்ணறிவு பிரிவு அதிகாரிகள் சோதனை செய்து கொண்டிருந்தனர்.அப்போது மதுரையை சேர்ந்த கண்ணன் என்ற பயணி சந்தேகப்படும்படியாக நின்று கொண்டிருந்தார். அவரை அதிகாரிகள் சோதனை செய்த போது அவரது கைப்பையில் ரூ.8 லட்சம் மதிப்பிலான அமெரிக்க டாலர்கள் இருந்தது தெரியவந்தது.இதனை தொடர்ந்து அவற்றை பறிமுதல் செய்து கண்ணனை சுங்கத்துறை அதிகாரிகளிடம் ஒப்படைத்தனர். அவர்கள் கண்ணனிடம் தொடர்ந்து விசாரண நடத்தி வருகின்றனர்.
