நெல்லை:
நெல்லை மாநகராட்சி தச்சநல்லூர் மண்டலம் 2-வது வார்டுக்குட்பட்ட மங்களாகுடியிருப்பு பகுதியில் ஏராளமானவர்கள் வசித்து வருகிறார்கள்.
இந்நிலையில் அப்பகுதியில் கடந்த ஒரு வாரமாக குடிநீர் வழங்கப்படவில்லை என கூறப்படுகிறது. இதனால் பொதுமக்கள் பாதிக்கப்பட்டனர்.
இது தொடர்பாக 2-வது வார்டு கவுன்சிலர் முத்துலெட்சுமி சண்முகபாண்டியன் மாநகராட்சியில் கோரிக்கை விடுத்தார். இதைத்தொடர்ந்து தச்சநல்லூர் மண்டல உதவி கமிஷனர் லெனின் உடனடியாக அப்பகுதிக்கு தண்ணீர் வழங்க உத்தரவிட்டார்.
இதையடுத்து மங்களாகுடியிருப்பு பகுதியில் இன்று மாநகராட்சி சார்பில் லாரிகள் மூலம் தண்ணீர் விநியோகிக்கப்பட்டது.
தொடர்ந்து 2 நாட்களுக்கு ஒருமுறை தண்ணீர் தடையின்றி வழங்க வேண்டும் என அப்பகுதியினர் கோரிக்கை விடுத்துள்ளனர்.
