திருப்பரங்குன்றம்,
முருகப்பெருமானின் அறுபடைவீடுகளில் முதல் படைவீடு என பெருமை பெற்றது திருப்பரங்குன்றம். இங்கு கொண்டாடப்படும் விழாக்களில் மிகவும் பிரசித்திபெற்றது பங்குனி திருவிழா.
ஆண்டுதோறும் 15நாட்கள் இந்தவிழா கொண்டாடப்படுகிறது. இந்த ஆண்டுக்கான பங்குனி திருவிழா இன்று(செவ்வாய்க்கிழமை) காலை கொடியேற்றத்துடன் தொடங்கியது.
விழாவினை முன்னிட்டு உற்சவர் சன்னதியில் முருகப்பெருமான், தெய்வானைக்கு பால், சந்தனம், இளநீர் உள்ளிட்ட 16வகை சிறப்பு அபிஷேகங்கள் நடைபெற்று சிறப்பு அலங்காரத்தில் கம்பத்தடி மண்டபத்தில் எழுந்தருளினார்.
அங்கு முருகப்பெருமான் முன்னிலையில் தங்கமுலாம் பூசப்பட்ட கொடிக்கம்பத்தில் கொடியேற்றம் நடைபெற்றது.
முன்னதாக தங்க முலாம் பூசப்பட்ட கொடிக்கம்பத்தில் சிறப்பு அபிஷேகம் நடைபெற்றது. தர்பை, புல், மா இலை கொண்டு சிறப்பு அலங்காரம் செய்யப்பட்டிருந்தது.
விழாவினை முன்னிட்டு முருகன், தெய்வானையோடு தினமும் காலையில் தங்கப் பல்லக்கிலும், மாலையில் தங்க குதிரை, அன்ன வாகனம், பூத வாகனம், தங்க மயில்வாகனம், வெள்ளி யானைவாகனம் உள்ளிட்ட பல்வேறு வாகனங்களில் எழுந்தருளி வீதிஉலா வந்து பக்தர்களுக்கு அருள்பாலிப்பார்.
விழாவின் 5ம் நாள் நிகழ்ச்சியாக கைபார நிகழ்ச்சி நடைபெறும். 17ந்தேதி பவுர்ணமி சிறப்பு பூஜையும், 18ந்தேதி பங்குனி உத்திர திருவிழாவும், 20ந்தேதி இரவு 7 மணிக்கு முருகப்பெருமானுக்கு பட்டாபிஷேக நிகழ்ச்சியும் நடைபெறுகிறது.
விழாவின் முக்கிய நிகழ்ச்சியாக 21ந்தேதி மீனாட்சி அம்மன், சொக்கநாதர், பிரியாவிடை முன்னிலையில் முருகப்பெருமான்&தெய்வானை அம்மனுக்கு திருக்கல்யாண வைபவம் நடைபெறும்.
22ந்தேதி தேரோட்டம் நடக்கிறது. இதற்காக காலை ஆறு மணி அளவில் அலங்கரிக்கப்பட்ட பெரிய தேரில் முருகப்பெருமான் தெய்வானையோடு எழுந்தருளி கிரிவீதி வழியாக சுற்றிவந்து பக்தர்களுக்கு அருள்பாலிப்பார். விழா ஏற்பாடுகளை கோவில் நிர்வாகம் செய்து வருகிறது.
