தேனி:
தேனி மாவட்டம் பெரியகுளம் அருகே உள்ள நல்லகருப்பன்பட்டியைச் சேர்ந்த பாலதண்டபாணி (வயது 47). திருப்பூரில் பணியாற்றி வந்த இவர் ஊரடங்கு காரணமாக சொந்த ஊருக்கு திரும்பினார். உடல் நிலை பாதிக்கப்பட்டு தேனி அரசு மருத்துவக்கல்லூரியில் அனுமதிக்கப்பட்டபோது அவருக்கு கொரோனா தொற்று உறுதியானது. பின்னர் மூச்சுத்திணறல் ஏற்பட்டு பரிதாபமாக உயிரிழந்தார்.
அவரது உடலை உறவினர்கள் வாங்கச் சென்றனர். அரசு மருத்துவக்கல்லூரி மருத்துவமனை பிணவறையில் அங்கிருந்த பணியாளர்கள் உதவியுடன் பாலதண்டபாணி உடலை எடுத்துச் சென்றனர். இது குறித்த வீடியோ சமூக வலைதளங்களில் வெளியாகி மிகுந்த பரபரப்பை ஏற்படுத்தியது.
இதனையடுத்து தேனி அரசு மருத்துவக்கல்லூரி முதல்வர் பாலாஜி நாதனிடம் சுகாதாரத்துறை செயலாளர் ராதாகிருஷ்ணன் விளக்கம் கேட்டார். அதன்படி அளிக்கப்பட்ட அறிக்கையில் பணியாளர்கள் அலட்சியம் காரணமாக கொரோனாவால் இறந்தவரின் உடலை எடுத்துச் சென்றது விசாரணையில் தெரிய வந்தது.
இதையும் படியுங்கள்... தேனி அரசு மருத்துவ கல்லூரி மருத்துவமனையில் உயிரை குடிக்கும் கொரோனாவால் பிணவறையில் குவிந்த உடல்கள்
இதனையடுத்து பிணவறையில் பணிபுரிந்த நாகஜோதி, ஞானசேகரன் ஆகியோர் மருத்துவக்கல்லூரியில் நுண்ணுயிரியல் துறைக்கு பணியிட மாற்றம் செய்யப்பட்டு துறை ரீதியான நடவடிக்கை எடுக்க பரிந்துரை செய்யப்பட்டுள்ளது.
மேலும் தனியார் நிறுவன பணியாளர் பாண்டீஸ்வரனை பணி நீக்கம் செய்துள்ளதாக அந்நிறுவனம் சார்பில் தெரிவித்துள்ளது என்று முதல்வர் விளக்கமளித்துள்ளார். இது குறித்து முதல்வர் பாலாஜிநாதன் தெரிவிக்கையில், சுகாதாரத்துறை செயலாளர் உத்தரவுப்படி, பிணவறையில் உதவியாளர்கள் 5 பேர், வாட்ச்மேன் 2 பேர் ஆகியோர் சுழற்சி முறையில் பணியாற்ற உத்தரவிடப்பட்டுள்ளது.
பிணவறைக்குள் உறவினர்கள் சென்று உடலை எடுத்துச் சென்ற சம்பவத்தில் 3 பேர் மீது நடவடிக்கை எடுக்கப்பட்டுள்ளது. இனிமேல் இது போன்ற ஒரு சம்பவம் நடைபெறாமல் உரிய நடவடிக்கை எடுக்கப்படும் என்றார்.
