மதுரை பரவை மார்க்கெட்டில் சின்ன வெங்காயம் மூட்டைகள் திருட்டு

மதுரை:

கடந்த சில தினங்களாக சின்ன வெங்காயத்தின் விலை ஒரு கிலோ ரூ.150-க்கும் மேல் விற்பனையாகி வருகிறது.

இந்தநிலையில் மதுரை மார்க்கெட்டில் சின்னவெங்காய மூட்டைகள் திருட்டு போன சம்பவம் அரங்கேறி இருக்கிறது. அதுபற்றி வருமாறு:-

மதுரை அன்பு நகர் அன்னை அபிராமி தெருவை சேர்ந்தவர் அக்பர் (வயது 43). இவர் பரவை காய்கறி மார்க்கெட்டில் கடை வைத்துள்ளார். சம்பவத்தன்று இவரது கடையில் இருந்த 50 கிலோ எடை கொண்ட 5 மூட்டை சின்னவெங்காயத்தை மர்ம நபர்கள் திருடிச் சென்றுள்ளனர். இதுதொடர்பாக கூடல்புதூர் போலீசில் புகார் அளிக்கப்பட்டது.

போலீசார் நடத்திய விசாரணையில், வெங்காய மூட்டைகளை திருடிச் சென்றது தேனி மாவட்டம் பெரியகுளம் பகுதியை சேர்ந்த ராஜேஷ்குமார், மாசாணகுமார், இத்ரீஸ் என்பது தெரியவந்தது. போலீசார் அவர்கள் 3 பேரையும் கைது செய்து, 5 மூட்டை சின்னவெங்காயத்தையும் பறிமுதல் செய்தனர்.