ராசிபுரம்:
ராசிபுரம் அருகேயுள்ள பட்டணம் பகுதியை சேர்ந்தவர் நந்தகுமார் (வயது 21). இவருடைய உறவினர் பெண்ணுக்கு 15 வயதாகிறது. இந்த நிலையில் கடந்த 17-ந் தேதி இரவு அந்த சிறுமி வீட்டில் இருந்து பட்டணத்தில் உள்ள நந்தகுமார் வீட்டுக்கு வந்துவிட்டார்.
பின்னர் நேற்று காலையில் நந்தகுமாருக்கும், அந்த சிறுமிக்கும் திருமணம் பட்டணத்தில் நடைபெறுவதாக இருந்தது. இந்த தகவல் நாமக்கல் சைல்டுலைன் அமைப்பினருக்கு தெரிய வந்தது.
இதையடுத்து சம்பவ இடத்திற்கு நாமக்கல் மாவட்ட குழந்தைகள் நலக்குழு உறுப்பினர் கவிதா, ராசிபுரம் சமூக நலத்துறை மகளிர் ஊர்நல அலுவலர் கமலம், கிராம நிர்வாக அலுவலர் வான்மதி, ராசிபுரம் பெண் போலீசார் ஆகியோர் விரைந்து சென்று நந்தகுமாரின் பெற்றோரிடம் விசாரணை நடத்தினர். சிறுமி 18 வயதை அடையாததால் திருமணத்தை நடத்தக் கூடாது என்று அவர்களிடம் அறிவுறுத்தினர். அதன் பேரில் நேற்று நடக்க இருந்த திருமணம் தடுத்து நிறுத்தப்பட்டது.
நாமக்கல் மாவட்ட குழந்தைகள் நலக்குழுமத்தின் முன் ஆஜர்படுத்த சிறுமியை அதிகாரிகள் அழைத்துச் சென்றனர். இந்த சம்பவம் அந்த பகுதியில் பரபரப்பை ஏற்படுத்தியது.
