விபத்தில் சிக்கிய குஷ்பு, மருத்துவ கலந்தாய்வு, பசுக்களை பாதுகாக்க தனி அமைச்சகம் உள்ளிட்ட முக்கிய செய்திகள்

* சபரிமலை ஐயப்பன் கோவிலில் படிபூஜை போன்ற சிறப்பு பூஜைகள் நடைபெறும் நேரத்தில் பக்தர்கள் சாமியை தரிசிக்க அனுமதி இல்லை என்று தேவஸ்தானம் அறிவித்து உள்ளது.

* மத்திய பிரதேச மாநிலத்தில் பசுக்களை பாதுகாப்பதற்காக தனி அமைச்சகம் உருவாக்கப்படும் என அறிவிக்கப்பட்டுள்ளது. இந்த அமைச்சகத்தின் முதல் கூட்டம் வருகிற 22ம் தேதி நடைபெற உள்ளது.

* இந்தியாவில் கொரோனாவால் பாதிக்கப்பட்டோரின் மொத்த எண்ணிக்கை 89 லட்சத்தை தாண்டியுள்ளது. இதுவரை 83.35 லட்சம் பேர் பாதிப்பில் இருந்து மீண்டுள்ளனர். 4.46 லட்சம் பேர் சிகிச்சையில் உள்ளனர். உயிரிழப்பு 1.47 சதவீதமாகவும், குணமடையும் விகிதம் 93.52 சதவீதமாகவும் உள்ளது. 

* மிகக்குறைந்த வெப்பநிலையில், பைசர் என்ற அமெரிக்க நிறுவனத்தின் கொரோனா தடுப்பூசி மருந்தை சேமித்து வைப்பது சவாலாக இருக்கும் என்று மத்திய அரசு கூறியுள்ளது.

* தமிழகத்தில் மருத்துவ படிப்புகளுக்கான கலந்தாய்வு இன்று தொடங்கியது. கலந்தாய்வில் பங்கேற்கும் மாணவர்களுக்கு கொரோனா பரிசோதனை செய்யப்படுகிறது. இன்றும் நாளையும் 7.5 சதவீதம் உள்ஒதுக்கீடு அடிப்படையில் பயன்பெற இருக்கும் அரசுப் பள்ளி மாணவர்களுக்கான கலந்தாய்வு நடைபெறுகிறது.

* வேல் யாத்திரையில் பங்கேற்பதற்காக நடிகை குஷ்பு சென்ற கார், செங்கல்பட்டு மாவட்டம் மதுராந்தகம் அருகே கண்டெய்னர் லாரியுடன் மோதி விபத்துக்குள்ளானது. இதில் குஷ்பு அதிர்ஷ்டவசமாக உயிர்தப்பினார். 

* தமிழகத்தில் உள்ள 779 ஏரிகள் முழு கொள்ளளவை எட்டியிருப்பதாக அமைச்சர் ஆர்.பி.உதயகுமார் கூறினார். மழை, வெள்ளம் தொடர்பாக சமூக வலைதளங்களில் வெளியாகும் வதந்திகளை நம்ப வேண்டாம் என்றும் அவர் கேட்டுக்கொண்டார்.

* நெல்லை, தென்காசி மாவட்டத்தில் மேற்கு தொடர்ச்சி மலையில் நீர்பிடிப்பு பகுதிகளில் பலத்த மழை பெய்து வருவதால் அணைகளுக்கு நீர்வரத்து அதிகரித்து உள்ளது. தாமிரபரணி ஆற்றில் வெள்ளப்பெருக்கு ஏற்பட்டு உள்ளது. குறுக்குத்துறை முருகன் கோவிலை தண்ணீர் சூழ்ந்தது.

* சொத்து குவிப்பு வழக்கில் தண்டனை பெற்று பெங்களூரு சிறையில் இருக்கும் சசிகலா, தனது அபராதத் தொகையான 10.10 கோடி ரூபாயை சிறப்பு நீதிமன்றத்தில் செலுத்தினார்.

* கில்கிட்-பல்திஸ்தான் சட்டமன்ற தேர்தலில் பிரதமர் இம்ரான் கானின் பாகிஸ்தான் தெஹ்ரீக் இ இன்சாப் கட்சி அதிக தொகுதிகளை கைப்பற்றியது.

* அமெரிக்க தேர்தல் தொடர்பாக டிரம்பின் குற்றச்சாட்டை நிராகரித்த தேர்தல் பாதுகாப்பு அதிகாரி பணியில் இருந்து நீக்கப்பட்டுள்ளார்.

* இங்கிலாந்து கிரிக்கெட் அணியின், பாகிஸ்தான் தொடரை அடுத்த ஆண்டு செப்டம்பர் அல்லது அக்டோபர் மாதம் வரை தள்ளிவைப்பது என்று முடிவு செய்யப்பட்டு இருப்பதாக தகவல்கள் வெளியாகி இருக்கின்றன.

* புற்றுநோயால் பாதிக்கப்பட்டு சிகிச்சை பெற்று வரும் நடிகர் தவசியிடம் தொலைபேசி மூலம் ரஜினிகாந்த் நலம் விசாரித்தார். நடிகர் தவசிக்கு திரைத்துறையினர் தொடர்ந்து நிதியுதவி செய்துவருகின்றனர்.