திருவாரூர்:
திருவாரூர் அருகே வேலங்குடி கிராமத்தை சேர்ந்தவர் சேகர் (வயது 60). இவர் திருச்சி பெல் நிறுவனத்தில் பணியாற்றி ஓய்வு பெற்றவர். தற்போது விவசாய பணிகளை செய்து வருகிறார். இவர் தனது வீட்டின் பின்புற பகுதியில் கட்டிடம் கட்டுவதற்கான பணிகளை செய்து வருகிறார். இதன் காரணமாக வேலங்குடியில் உள்ள தனது வீட்டை பூட்டி விட்டு தற்காலிகமாக கூட்டுறவு நகரில் வசித்து வருகிறார். கட்டுமான வேலை நடப்பதால் அவ்வப்போது வீட்டுக்கு வந்து செல்வார்.
இந்தநிலையில் நேற்றுமுன்தினம் வீட்டுக்கு வந்து பார்த்த போது முன்பக்க கதவின் பூட்டு உடைக்கப்பட்டு திறந்து கிடந்தது. இதனால் அதிர்ச்சி அடைந்த அவர் உடனடியாக திருவாரூர் தாலுகா போலீசாருக்கு தகவல் தெரிவித்தார். இதனையடுத்து போலீசார் முன்னிலையில் வீட்டுக்குள் சென்று பார்த்த போது பீரோவில் இருந்த 5 பவுன் நகை மற்றும் ரூ.50 ஆயிரம் ஆகியவற்றை மர்மநபர்கள் திருடி சென்று இருப்பது தெரியவந்தது. இதுகுறித்து சேகர் கொடுத்த புகாரின் பேரில் திருவாரூர் தாலுகா போலீசார் வழக்குப்பதிவு செய்து நகை, பணத்தை திருடி சென்ற மர்ம நபர்களை வலைவீசி தேடி வருகின்றனர்.
