கடன் தொல்லையால் தொழில் அதிபர் தற்கொலை

வேடசந்தூர்:

திண்டுக்கல் மாவட்டம் வேடசந்தூர் வெங்கடாசலம் செட்டியார் தெருவை சேர்ந்தவர் கிருஷ்ணமூர்த்தி. அவருடைய மகன் கங்காதரன் (வயது 38). தொழில் அதிபர். இவர், தனது மனைவி இலக்கியா மற்றும் குழந்தையுடன் திருப்பூரில் தங்கியிருந்து ரெடிமேடு துணிகளை தைத்து விற்பனை செய்யும் தொழில் செய்து வந்தார். இதற்காக அவர், சிலரிடம் கடன் வாங்கி இருந்தார். கொரோனா ஊரடங்கு காரணமாக அவரால் தொழில் செய்ய முடியவில்லை. மேலும் கடன் கொடுத்தவர்கள், கங்காதரனிடம் பணம் கேட்டு தொல்லை கொடுத்தனர். இதனால் அவர் மனம் உடைந்து காணப்பட்டார். 

இந்தநிலையில் திருப்பூரில் இருந்து கங்காதரன் மட்டும் சொந்த ஊரான வேடசந்தூருக்கு நேற்று வந்தார். பின்னர் தனது வீட்டின் மாடி அறையில் உள்ள மின்விசிறியில் தூக்குப்போட்டு தற்கொலை செய்து கொண்டார். 

இது குறித்து வேடசந்தூர் போலீசாருக்கு தகவல் தெரிவிக்கப்பட்டது. அதன்பேரில் இன்ஸ்பெக்டர் கவிதா தலைமையிலான போலீசார் சம்பவ இடத்துக்கு விரைந்தனர். பின்னர் கங்காதரனின் உடலை கைப்பற்றி பிரேத பரிசோதனைக்காக வேடசந்தூர் அரசு மருத்துவமனைக்கு அனுப்பி வைத்தனர். மேலும் போலீசார் வழக்குப்பதிவு செய்து விசாரணை நடத்தி வருகின்றனர்.