அனுப்பர்பாளையம்:
திருப்பூர் கிழக்கு நல்லாத்துப்பாளையத்தை அடுத்த உப்பிலிபாளையம் ஏரிக்கரை பகுதியில் நேற்று ஒரு கும்பல் பணம் வைத்து சூதாட்டத்தில் ஈடுபடுவதாக அனுப்பர்பாளையம் போலீசாருக்கு ரகசிய தகவல் கிடைத்தது.
இதையடுத்து போலீஸ் சப்-இன்ஸ்பெக்டர் விவேக்குமார் தலைமையில் போலீசார் சம்பவ இடத்தை சுற்றி வளைத்தனர். அப்போது அங்கு 5 பேர் கொண்ட கும்பல் பணம் வைத்து சூதாட்டத்தில் ஈடுபட்டிருந்தது தெரிய வந்தது. இதை தொடர்ந்து 5 பேரையும் பிடித்து போலீசார் விசாரணை நடத்தினார்கள்.
இதில் அவர்கள் நெருப்பெரிச்சல் ஜி.என்.பாலன் நகரை சேர்ந்த மாரிமுத்து (வயது 60), ஆனந்தன் (46), உப்பிலிபாளையத்தை சேர்ந்த பாஸ்கர் (54), அர்த்தநாரீஸ்வரன் (30), செல்வராஜ் (31) என்பது தெரிய வந்தது. இதையடுத்து 5 பேரையும் கைது செய்த போலீசார் அவர்களிடம் இருந்து ரூ.4,200 மற்றும் 4 மோட்டார் சைக்கிள்களை பறிமுதல் செய்தனர். இதுகுறித்து அனுப்பர்பாளையம் போலீசார் வழக்குப் பதிவு செய்து விசாரணை நடத்தி வருகின்றனர்.
