மேலூர்:
மேலூர் அருகே உள்ள பூதமங்கலம் பொட்டப்பட்டியைச் சேர்ந்த சதீஷ் குமார் (வயது40), சுரேஷ் (30) உள்பட 6 பேர் டிராக்டரில் வைக்கோல் வாங்க மேலூர் புறப்பட்டுச் சென்றனர். சதீஷ்குமார் டிராக்டரை ஓட்டினார்.
மேலூர் 4 வழிச்சாலையில் சத்தியபுரம் பகுதியில் டிராக்டர் சென்றபோது சென்னையில் இருந்து மதுரை நோக்கி கார் வந்தது. வேகமாக வந்த அந்த கார் எதிர்பாராதவிதமாக டிராக்டரின் பின் பகுதியில் மோதியது.
இதில் டிராக்டரின் பின்பகுதி தலைகுப்புற கவிழ்ந்தது. அதில் பயணம் செய்த 5 தொழிலாளர்கள் தூக்கி வீசப்பட்டனர். படுகாயம் அடைந்த பொட்டப்பட்டி சுரேஷ், தர்மராஜ், வடிவேலு மற்றும் காரில் வந்தவர்கள் என 8 பேர் காயம் அடைந்தனர்.
அவர்கள் சிகிச்சைக்காக மேலூர் அரசு ஆஸ்பத்திரிக்கு அனுப்பி வைக்கப்பட்டனர். மேல் சிகிச்சைக்காக மதுரை அரசு ஆஸ்பத்திரிக்கு கொண்டு செல்லப்பட்ட சுரேஷ் வழியிலேயே இறந்தார்.
விபத்து குறித்து மேலூர் போலீசார் வழக்குப்பதிவு செய்து விசாரணை நடத்தி வருகின்றனர்.
