புதுச்சேரி:
புதுவை லாஸ்பேட்டை ஜீவா நகர் செயின்ட் பால்பேட்டை சேர்ந்தவர் அங்காளன் (வயது 65) கொத்தனார். இவருக்கு 2 மகள் 1 மகன் உள்ளனர். முதல் மகளுக்கும் மகனுக்கும் திருமணம் ஆகிவிட்ட நிலையில் கடைசி மகள் சசிரேகா (25) பி.ஏ படித்து உள்ளார்.
இவர் 3 ஆண்டுகளாக நேரு வீதியில் உள்ள ஒரு துணிக்கடையில் வேலை செய்தார். பின்னர் கடந்த மார்ச் மாதம் படிக்க செல்வதாக கூறி சென்னை சென்று விட்டார். பின்னர் தனது தந்தையிடம் போன் மூலம் ஹாஸ்டலில் தங்கி படித்து கொண்டிருப்பதாக தெரிவித்தார்.
பின்னர் சசிரேகா துணிக்கடையில் வேலை பார்த்த போது உடன் வேலை செய்த முத்தியால்பேட்டையை சோலை நகரை சேர்ந்த இஸ்ஷாக் என்பவரை கடந்த ஆண்டு திருமணம் செய்து தனது பெயரை ஆயிஷா என மாற்றிக்கொண்டார்.
இவர்களுக்கு 4 மாத குழந்தை உள்ளது. இதற்கிடையில் ஏற்கனவே இஸ்ஷாக்கிற்கு திருமணமாகி மனைவி மற்றும் குழந்தைகள் உள்ளனர். தற்போது இஸ்ஷாக் மற்றும் ஆயிஷா இருவரும் கோவிந்த சாலையில் வசித்து வருகின்றனர்.
இதனையறிந்த அங்காளன் ஆயிஷாவிடம் ஏன் இப்படி செய்தாய் எங்களை அவமானபடுத்தி விட்டாயே என கூறிதிட்டினார். மேலும் அங்காளன் மற்றும் அவரது குடும்பத்தினர் ஆயிஷாவிடம் பேசாமல் இருந்துள்ளனர். இதனால் மனவருத்தத்தில் இருந்து வந்தார். மேலும் தற்கொலை செய்து கொள்ள முடிவு செய்த ஆயிஷா நேற்று இரவு சமையலறையில் தன்னுடைய துப்பட்டாவால் தூக்கு மாட்டி தற்கொலை செய்து கொண்டார்.
இதனையறிந்த ஆயிஷாவின் தந்தை அங்காளன் பெரியக்கடை போலீஸ் நிலையத்தில் புகார் அளித்தார். புகாரின் பேரில் போலீசார் வழக்குப்பதிவு செய்து விசாரணை நடத்தி வருகின்றனர்.
