சென்னை:
சென்னை சென்ட்ரல் புறநகர் ரெயில் நிலையத்தில் நேற்று மாலை 4 மணி அளவில் பயணிகளிடம் செல்போன்களை பறித்துக் கொண்டு 4 இளைஞர்கள் தப்பி ஓடினர்.
அப்போது அங்கு பாதுகாப்பு பணியில் ஈடுபட்டிருந்த ரெயில்வே பாதுகாப்பு படை போலீஸ் காரர்கள் யோகேஸ்குமார், ரத்தன்லால் இருவரும் கொள்ளையர்களை விரட்டினர்.
ஆனால் 3 கொள்ளையர்கள் தப்பி ஓடிவிட்டனர். ஒருவன் மட்டும் போலீசில் சிக்கினான். போலீசார் மடக்கி பிடித்தும் பிடியில் இருந்து தப்பிச்செல்ல அவன் முயற்சித்தான். இதனால் போலீஸ்காரர் யோகேஷ் குமாருக்கும் கொள்ளையனுக்கும் இடையே மோதல் ஏற்பட்டது.
இதில் தான் மறைத்து வைத்திருந்த பெரிய பட்டா கத்தியால் கொள்ளையன் திடீரென தாக்குதலில் ஈடுபட்டான். போலீஸ்காரர் யோகேஷ் குமாரின் தலையில் வெட்டு விழுந்தது.
ரத்தம் கொட்டியது. அதற்குள் மற்ற போலீஸ்காரர்கள் சூழ்ந்து கொண்டு யோகேஷ் குமாருடன் சேர்ந்து கொள்ளையன் தப்பி செல்ல முடியாத வகையில் பிடித்து கைது செய்தனர்.
காயம் அடைந்த யோகேஷ் குமார் சென்னை ராஜிவ் காந்தி அரசு ஆஸ்பத்திரியில் அனுமதிக்கப்பட்டார். தலையில் ஏற்பட்ட காயத்துக்கு சிகிச்சை அளிக்கப்பட்டது. கைது செய்யப்பட்ட கொள்ளையன் பெயர் விஜய் (21).
திருவல்லிக்கேணி விக்டோரியா ஆஸ்பத்திரி அருகில் வசித்து வந்த இவர் தனது கூட்டாளிகளுடன் சேர்ந்து பயணிகளிடம் செல்போன் பறிப்பில் ஈடுபட்டது தெரியவந்தது. அவனிடமிருந்த 4 செல்போன்களும் கைப்பற்றப்பட்டன. பெரிய கத்தியும் பறிமுதல் செய்யப்பட்டது. தப்பி ஓடிய கொள்ளையர்களை பிடிக்க போலீசார் தேடிவருகிறார்கள்.#tamilnews
