கோவை:
டிஜிட்டல் போர்டுகளில் உயிரோடு இருப்பவர்களின் படத்தை வைக்க கோர்ட்டு தடை விதித்தது.
இந்நிலையில் கோவை காந்திபுரத்தில் புதிதாக கட்டப்பட்டுள்ள மேம்பாலத்தை முதல்-அமைச்சர் எடப்பாடி பழனிசாமி இன்று மாலை திறந்து வைக்கிறார்.
விழாவில் பங்கேற்பதற்காக கோவைக்கு வருகை தரும் முதல்-அமைச்சரை வரவேற்று காந்திபுரம் மேம்பாலத்தின் அருகே ராட்சத பலூன் பறக்க விடப்பட்டுள்ளது.
அந்த பலூனில் மறைந்த முதல்-அமைச்சர்கள் எம்.ஜி.ஆர்., ஜெயலலிதா ஆகியோரது படங்கள் இடம் பெற்றுள்ளது. மேலும் முதல்-அமைச்சர் எடப்பாடி பழனிசாமி, துணை முதல்-அமைச்சர் ஓ.பன்னீர்செல்வம், அமைச்சர் எஸ்.பி.வேலு மணி, எம்.எல்.ஏ.க்கள் அம்மன் அர்ச்சுனன், பி.ஆர்.ஜி.அருண்குமார் ஆகியோரது உருவப்படம் பதிக்கப்பட்டுள்ள அந்த பிரமாண்ட பலூன் வானில் பறக்க விடப்பட்டுள்ளது.
அ.தி.மு.க.வினரின் இந்த புது யுக்தி பரபரப்பாக பேசப்படுகிறது. அதேநேரம் முதல்-அமைச்சரை வரவேற்று வைக்கப்பட்டுள்ள டிஜிட்டல் போர்டுகளில் எம்.ஜி.ஆர்., ஜெயலலிதா ஆகியோரது படங்கள் மட்டும் இடம் பெற்றுள்ளது குறிப்பிடத்தக்கது.
