குடி பழக்கத்தை பெற்றோர் கண்டித்ததால் திருமணமான வாலிபர் தூக்குப்போட்டு தற்கொலை

புதுச்சேரி:

புதுவை கொம்பாக்கத்தை சேர்ந்தவர் மணிகண்டன் (வயது 28). கொத்தனார். இவரது மனைவி தீபா. இவர்களுக்கு 2 மகன்கள் உள்ளனர்.

மணிகண்டன், தனது பெற்றோர் வசிக்கும் வீட்டின் மாடியில் குடும்பத்துடன் வசித்து வந்தார். நேற்று இரவில் இவர் குடிபோதையில் வீட்டுக்கு வந்ததாக தெரிகிறது. அதனை கண்ட அவரது பெற்றோர் கண்டித்தனர்.

இதனால் ஆத்திரமடைந்த மணிகண்டன் அவர்களுடன் தகராறு செய்தார். பின்னர், பெற்றோர் கண்டித்ததால் ஏற்பட்ட விரக்தியில், தனது வீட்டில் தூக்குப்போட்டு தற்கொலை செய்து கொண்டார். அவரது உடலை கண்டு மனைவி மற்றும் குடும்பத்தினர் கதறி அழுதது பரிதாபத்தை ஏற்படுத்தியது.

முதலியார்பேட்டை போலீஸ் சப்-இன்ஸ்பெக்டர் ராஜன் வழக்கு பதிவு செய்து விசாரணை நடத்தி வருகிறார்.