நாகர்கோவில்:
தி.மு.க. குமரி மாவட்ட செயலாளரும், எம்.எல்.ஏ. வுமான சுரேஷ் ராஜன் வெளியிட்டுள்ள அறிக்கையில் கூறியிருப்பதாவது:-
இந்திய தேர்தல் ஆணையத்தின் அறிவுரைப்படி 2017-ம் ஆண்டிற்கான வாக்காளர் பட்டியல் சிறப்பு சுருக்க முறை திருத்தம் நடைபெற உள்ளது. அதன்படி வரைவு வாக்காளர் பட்டியல் அடுத்த மாதம் 1-ந்தேதி அன்று வெளியிடப்படுகிறது.
வாக்காளர் பட்டியல் தொடர்பான புகார்கள் மற்றும் கோரிக்கை மனுக்களை அடுத்த மாதம் 1-ந்தேதி முதல் 30-ந்தேதி வரை கொடுக்கலாம். வாக்காளர் பட்டியல் கிராமசபை கூட்டங்களில் வெளியிடப்பட்டு அடுத்த மாதம் 10 மற்றும் 24-ந்தேதிகளில் சரிபார்க்கப்படும்.
மேலும் அடுத்த மாதம் 11 மற்றும் 25-ந்தேதிகளில் வாக்குச்சாவடியில் சிறப்பு முகாம்கள் நடைபெறுகிறது. பின்னர் இறுதி வாக்காளர் பட்டியல் அடுத்த ஆண்டு ஜனவரி 5-ந்தேதி வெளியிடப்படுகிறது.
எனவே ஒன்றிய, நகர, பேரூர், ஊராட்சி. கிளை மற்றும் வட்ட செயலாளர்கள் வாக்காளர் பட்டியலில் பெயர் சேர்த்தல், நீக்கல், திருத்தம் செய்தல், போன்ற பணிகளில் உடனடியாக ஈடுபட வேண்டும்.
இவ்வாறு அவர் கூறி உள்ளார்.
