புதுச்சேரி:
புதுவை சட்டசபை பட்ஜெட் கூட்டத் தொடர் கடந்த 24-ந்தேதி தொடங்கியது. அன்றைய தினம் கவர்னர் கிரண்பேடி உரையாற்றினார்.
இதையடுத்து 25 மற்றும் 26-ந்தேதி கவர்னர் உரைக்கு நன்றி தெரிவிக்கும் தீர்மானத்தின் மீது விவாதம் நடைபெற்றது. சனி மற்றும் ஞாயிற்றுக்கிழமை விடுமுறை தினம் என்பதால் சட்டசபை கூட்டம் நடைபெறவில்லை.
இந்த நிலையில் நாளை (திங்கட்கிழமை) காலை 9.30 மணிக்கு மீண்டும் சட்டசபை கூடுகிறது. நிதி பொறுப்பு வகிக்கும் முதல்-அமைச்சர் நாராயணசாமி பட்ஜெட்டை தாக்கல் செய்கிறார்.
புதிய காங்கிரஸ் அரசு பொறுப்பேற்று முதல்- அமைச்சர் நாராயணசாமி முதல் முறையாக தாக்கல் செய்யப்படும் பட்ஜெட் என்பதால் பல்வேறு அறிவிப்புகள் வெளியாகும் என கூறப்படுகிறது.
இதற்கிடையே முதல்- அமைச்சர் நாராயணசாமி பட்ஜெட் தொடர்பாக தொழில் அதிபர்கள், வியாபாரிகள், விவசாயிகள், மீனவர்கள் என பலதரப்பட்டவர்களிடம் ஆலோசனை நடத்தினார்.
நேற்று மாலை 6 மணி அளவில் பட்ஜெட்டுக்கு இறுதி வடிவம் கொடுக்க சட்டமன்றத்தில் அமைச்சரவை கூடியது. கூட்டம் இன்று (ஞாயிற்றுக்கிழமை) அதிகாலை 4.30 மணி வரை நடைபெற்றது.
கூட்டத்தில் துறை வாரியாக நடைமுறையில் உள்ள திட்டம், நடை முறைப்படுத்த வேண்டிய திட்டம், கையிருப்பு நிதி, தேவையான நிதி என விரிவாக ஆலோசனை செய்யப்பட்டது.
மக்கள் பாதிக்கப்படாத வகையில் நலத் திட்டங்களை தொடர்ந்து செயல்படுத்திட தேவையான நிதியை மத்திய அரசிடம் பெறுவது குறித்து விரிவான ஆலோசனை மேற்கொண்டதாக கூறப்படுகிறது.
