கந்தன் புகழ் பாடும் கந்தர் அலங்காரம் - தீராத வினைகளைத் தீர்க்கும் தீர்த்தகிரி

முருகா என்று அழைத்தால் செவ்வேள் ஓடியும் வருவான். கண்ணுக்கெதிரே மலைபோல் தோன்றும் துன்பங்களையும் வேல் கொண்டு சிதறடிப்பான் முருகன். கலியுகத்தின் கண்கண்ட தெய்வமாக விளங்கும் கந்தன், சொல்லும்போதே இனிக்கும் கற்கண்டாய் இருக்கும் செந்தில்வேலவன், உயர்ந்த பண் புகளெல்லாம் அமைந்த உயர்தனிப் பொருளாக விளங்குகிறான்.
கலியுகம் என்பது தீமைகள் நிறைந்த யுகம். நம் உறுதியைக் குலைத்து, உண்மைகளை மறைத்து, தீயவர்கள் ஓங்கி நிற்கவும், நல்லவர்கள் மனம் குமுறி, தீவினைகளின் செயல் களால் மனம் வாடி நிற்கவும் செய்யும் யுகம்.

இந்தக் காலத்தில் எல்லோரையும், எல்லா இடத்திலும் காத்து நிற்பவன் செவ்வேள்.  அன்பு உள்ள இடத்தில் இன்பம் உண்டாகும். முருகன் அன்பு வடிவம். அன்பே சத்தியம், அன்பே நித்தியம் என்று அவனைப் போற்றுகிறது கந்தகுரு கவசம்.

வேலூர் அருகே அமைந்த தீர்த்தகிரி வடிவேல் சுப்ரமணியர் திருக்கோவில் பல விதங்களில் சிறப்பு பெற்று விளங்குகிறது. வள்ளியை மணம் புரிய கந்தன் வள்ளிமலை நோக்கிச் செல்லும்போது தீர்த்தகிரி மலையில் சிறிது நேரம் தங்கி இளைப்பாறியதாகக் கூறுகிறார்கள். இதற்கு ஆதாரமாக மருகனின் பாதச் சுவடுகள் மலையேறிச் செல்லும் பாதையில் உள்ளது.

222 படிகள் உள்ளது.. படியேறும் போது பத்து படிகள் ஏறியதுமே  வலதுபுறம் முருகனின் திருவடி தரிசனம் கிடைக்கிறது. இடது புறம் கன்னிமார்கள் சன்னதியும், வலது புறம் விழுதுகள் இல்லாத கல்லால மரமும் காட்சி தருகின்றது. மலையில் அழகான ஆலயம் கண்ணையும், மனதையும் கவருகிறது. ஆலயத்தின் மேற்கே ஆலமரம், கிழக்கே அத்திமரம், தென்கிழக்கே அரசமரம், வட கிழக்கே தலமரமான நாவல் மரம் ஆகியவை காணப்படுகிறது. ஆலமரத்தின் அடியில் ஒரு பாறையின் கீழ் இன்றும் சுனை நீர் பொங்கி வழிந்து கொண்டிருக்கிறது. இதனாலேயே இத்தலம் தீர்த்தகிரி என்று அழைக்கப் படுகிறது.

வள்ளியை காதலித்து மணந்த முருகன் தன் மனைவிக்கு சம மான இடம் தந்திருக்கிறான். தன்னில் பாதியாக மனைவியைக் கருதி அவளுக்கு உரிய மரியாதையைத் தர வேண்டும் என்று காண்பிக்கிறான் குமரன். எனவே இங்கு காதல் திருமணம்தான் அதிகம் நடக்கிறது.

கலியுகத்தின் கண்கண்ட தெய்வமாக விளங்கும் முருகன் அழைத்தவர் குரலுக்கு உடனே ஓடி வருகிறான். இதையே தன் கந்தர் அலங்காரப் பாடலில் “சொன்ன கிரவுஞ்ச கிரியூடுருவ” என்கிறார். பொன் மயமான கிரவுஞ்ச மலையைப் பிளந்து அதில் அடைந்து கிடந்த  லட்சக் கணக்கான வீரர்களையும், பூதத் தலைவர்களையும் காப்பாற்றினார்
இதையே கந்தர் அந்தாதியில் அடியார் களுக்கு அருளும் வரப் பிரசாதத்தை உடைய, மயிலின் மேல் ஏறி கிரவுஞ்ச மலையைத் தன் வேலால் தூளாக்கிய முருகப் பெருமானின் திருவடிகளை நான் அணுகாத காரணத்தினால், பஞ்ச இந்திரியங்களின் செயல்களால் என் இதயம் இருளில் மூழ்கி இருக்கிறது என்கிறார் அருணகிரிநாதர்.

சிறைவர வாமையில் வாங்கிதன் றேங்கழல் ஜியாங்கழலாச்
சிறைவர வாமையி நெஞ்சுட னேநின்று தேங்குவதே” என்று பாடுகிறார்.
உள்ளத்தில் உறைகின்ற அருள் ஜோதியை உணர்ந்து கொள். அவனையே நினைத்து அவனையே உருகப் பாடி, இருந்தால் முருகன்
கைவேல் நம்மைக் காக்கும் என்கிறார் நக்கீரர்.
குன்றம் எறிந்தாய்!குறை கடலில்சூர்தடித்தாய்
புன்தலைய பூதப் பொருபடையாய் - என்றும்
இளையாய்! அழகியாய்! ஏறூர்ந்தான் ஏறே!
உளையாய் என் உள்ளத்துறை”
என்று வேண்டுகிறார்.

ஏறு ஏறுகின்ற சிவபெருமானின் மைந்தனே கிரவுஞ்ச மலையையும், கடலையும் அழித்து சூரனைக் கொன்ற பூதப்படையை உடையா சிங்கம் போன்ற அழகியவனே, என்றும் தமிழ் போல் இளமையாய் இருக்கும் வேந்தனே நீ என் உள்ளத்தில் அமர்வாய் என்கிறார்.

தீர்த்தகிரியில் இவர் பாடிய திருப்புகழ் நம்  அனைவருக்கும் முருகனின் பெருமையை உணர்த்துவதாக அமைந்துள்ளது. நல்ல நெறிகளை அறியவில்லை. இந்திரியங்களின் பின்னே ஓடுகிறோம். எழுதிய தலைவிதி என்பது எந்த வழியாக ஓடுகிறது என்பதையும் அறியவில்லை என்று அறிவுரை கூறுவது போல் அமைந்துள்ளது.

மனம் பாட்டின் பொருளையும், சொல்லையும் கேட்டு உருகுவதில்லை. யமன் வரும் வழியைக் கண்டும் பக்தியால் உருகுவதே, தினந்தோறும், கஷ்டங்களை அனுபவித்தாலும்,உண்மைப் பொருளை நாடி அணுகுவதில்லை. பாழ்படும் இந்தப் பிறப்புகளிலேயே ஈடுபடுகின்றது மனம்.

உடல் சிறையாகிய இந்தக் கூட்டை விட மனமில்லாத உனக்கு ஒரு அறிய வழி சொல்லுகிறேன் என்று இத்திருப்புகழைப் பாடுகிறார்.
பாட்டிலுருகிலை கேட்டுமுருகிலை  
கூற்று வழி வரு பார்த்து முருகிலை
பாட்டை யநுதின மேற்று மறிகிலை தினமானம்....என்று கூறுபவர்  
வாக்கு முனதுள நோக்கு மருளுவ ....னேத்த
புகழடி யார்க்கு மெளியனை வாழ்த்த இரு வினை
நீக்கு முருகனை மருவாயோ?”

என்று கேட்டு முருகனை வணங்குவதால் இருவினைகளும் தீரும் என்கிறார். ஈசனின் நெற்றிக் கண்ணிலிருந்து பிறந்தவனும், உமையவள் பாலனுமாகிய தீர்த்தகிரி இறைவனை வணங்க தீராத வினைகள் தீரும் என்கிறார்.

தீர்த்த எனதகம் ஏட்டையுடன் நினை ஏத்த
அருளுடன் நோக்கி அருளுதி . . . தீர்த்தமலை
நகர் காத்த சசிமகள் பெருமாளே!”- என்கிறார்.

இத்திருப்புகழையும், கந்தர் அலங்காரப் பாடலையும் தீர்த்தகிரி முருகனை நினைத்துச் சொல்லி வர தீராத வினைகள், குறைகள் அனைத்தும் தீரும் என்பது கண்கூடு என்கிறார்கள் பக்தர்கள். வேலை வாய்ப்பு, திருமண வரம், குழந்தை வரம் என்று வேண்டியதை அள்ளித் தரும் அருள் வள்ளல் முருகன்.

மலேசியா பத்துமலை முருகன் சிலையைப் போலவே இங்கும் 108 அடி உயர முருகன் சிலை அமைக்க பணிகள் நடைபெற்றுக் கொண்டிருக்கிறது. பத்துமலை முருகன் சிலையைச் செய்த சிற்பியே இந்தச் சிலையையும் வடிவமைத்துள்ளார்.