சென்னை:
அ.தி.மு.க.வில் ஓ.பி.எஸ்.- எடப்பாடி அணியினர் இணைவதில் ஏற்பட்டுள்ள இழுபறி குறித்து எடப்பாடி அணி செய்தி தொடர்பாளர் பேராசிரியர் தீரனிடம் கேட்ட போது அவர் கூறியதாவது:-
அ.தி.மு.க. இரு அணியினரும் நேற்று தனித் தனியாக ஆலோசனை நடத்தி நிர்வாகிகளின் கருத்துக்களை கேட்டறிந்தனர்.
இதில் சிறு சிறு கேள்விகளுக்கு பதில் கிடைக்காததால்தான் நேற்று உடனே இணைப்பை அறிவிக்க முடியாத நிலை ஏற்பட்டதாக கருதுகிறேன்.
ஓ.பி.எஸ். அணியில் உள்ள செம்மலை, பாண்டியராஜன், லட்சுமணன் ஆகியோரிடம் கேட்ட போது இணைவதில் ஒன்றும் பிரச்சினை இல்லை என்றுதான் தெரிவித்தனர்.
இரு அணிகளும் இணையும் போது எடப்பாடி அணியில் எப்படி ‘ட்ரீட்’ பண்ணுவார்கள் என்ற ஐயப்பாடு பற்றியும் விவாதிக்கப்பட்டுள்ளது. இதே போல் சிறு சிறு பிரச்சினைகள் கேள்விக்கனையாக எழுப்பப்பட்டுள்ளது. ஆனாலும் இதை பேசி ஒருமித்த கருத்தை கொண்டு வந்து விடுவோம் என்று நம்பிக்கை தெரிவித்தனர்.
எனவே ஓ.பி.எஸ். எடப்பாடி அணிகள் இணைவது உறுதி. இதில் 2 நாளில் நல்ல முடிவு வரும்.
அ.தி.மு.க. அணிகள் இணைவதை தொண்டர்கள் விரும்புகிறார்கள். சீக்கிரம் இரட்டை இலையை பெற வேண்டும் என்று ஆதங்கப்படுகிறார்கள்.
அதை செயல்படுத்தும் விதமாக இரு அணியினரும் நேற்று விவாதித்துள்ளனர். இதில் இழுபறி என்று சொல்வதைவிட முன்னேற்றம் என்றுதான் சொல்ல வேண்டும்.
திங்கட்கிழமை அமாவாசை வருகிறது. எனவே நல்ல நாள் பார்த்து இணைப்பை அறிவிக்கலாம்.
இவ்வாறு அவர் கூறினார்.
