ஸ்ரீவைகுண்டம் அங்காள பரமேஸ்வரி அம்மன் கோவிலில் மகா சிவராத்திரி உற்சவ திருவிழா தொடங்கியது || Maha Shivaratri festival

ஸ்ரீவைகுண்டம் அங்காள பரமேஸ்வரி அம்மன் கோவிலில் 10 நாட்கள் நடைபெறும் சிவராத்திரி உற்சவ திருவிழா நாட்களில் தினமும் சிறப்பு பூஜைகள், அபிஷேகம், அலங்கார தீபாராதனை நடைபெறுகிறது.

ஸ்ரீவைகுண்டம் அங்காள பரமேஸ்வரி அம்மன் கோவிலில் மகா சிவராத்திரி உற்சவ திருவிழா

ஸ்ரீவைகுண்டம் தெற்கு யாதவர்தெருவில் மாதாங்கோவில் என்று அழைக்கப்படும் குருநாதசுவாமி, அங்காள பரமேஸ்வரி அம்மன் கோவிலில் மகா சிவராத்திரி உற்சவ திருவிழா நேற்று கொடியேற்றத்துடன் தொடங்கியது. திரளான பக்தர்கள் சாமி தரிசனம் செய்தனர். தொடர்ந்து 10 நாட்கள் நடைபெறும் சிவராத்திரி உற்சவ திருவிழா நாட்களில் தினமும் சிறப்பு பூஜைகள், அபிஷேகம், அலங்கார தீபாராதனை நடைபெறுகிறது. 9-ம் திருநாளான பிப்.28ந்தேதி (திங்கள் கிழமை) முககாப்பு திருவிழாவும், இரவு 10மணிக்கு சிறப்பு பூஜைகளும் நடைபெறுகிறது.

இதனை தொடர்ந்து, அம்மன் முகம் தேரில் வீதி உலா வந்து நள்ளிரவு 1 மணிக்கு மேல் அம்மன் முகம் தாமிரபரணி ஆற்றில் கரைக்கப்படுகிறது. 10-ம் நாளான மார்ச் 1-ந்தேதி (செவ்வாய்கிழமை) மகாசிவராத்திரி அன்று காலையில் அம்மனுக்கு சிறப்பு பூஜையும், மதியம் 1 மணிக்கு உச்சிகால பூஜையும், இதனை தொடர்ந்து பக்தர்களுக்கு அன்னதானமும் வழங்கப்படுகிறது. மாலை 6 மணிக்கு திருவிளக்கு பூஜை நடக்கிறது.

இதனை தொடர்ந்து 1-வது காலம் பூஜை இரவு 9மணிக்கும், 2-வது கால பூஜை இரவு 11 மணிக்கும், 3-வது கால பூஜை இரவு 12 மணிக்கும், அம்மன் தேரில் வீதி உலா நிகழ்ச்சியும், இதனையடுத்து அதிகாலை 3 மணிக்கு 4-வது கால பூஜையும் நடக்கிறது. அதன்பிறகு சிகர நிகழ்ச்சியாக தாமிரபரணி ஆற்றுக்கு சென்று நீராடி புனித நீர் புதுக்குடங்களில் எடுத்து மேளதாளங்களுடன் ஊர்வலமாக கோவிலுக்கு சென்று மூலஸ்தானத்தில் அம்மன் முன்பு சிறப்பு பூஜைகளுடன் அம்மன் முன்பு அழகு நிறுத்துதல் நிகழ்ச்சி நடைபெறும்.