மீனாட்சிபேட்டை முத்து மாரியம்மன் கோவில் கும்பாபிஷேகம்

புதுவை உழவர்கரை நகராட்சி மீனாட்சிபேட்டை ரமணபுரத்தில் முத்துமாரியம்மன் கோவில் உள்ளது. இந்த கோவிலில் திருப்பணிகள் நடைபெற்று, கும்பாபிஷேக விழா கடந்த 12-ந் தேதி மகா கணபதி பூஜையுடன் தொடங்கியது.

விழாவையொட்டி தினமும் யாகசாலை பூஜைகள் மற்றும் தீபாராதனைகள் நடந்தது. முக்கிய நிகழ்ச்சியான கும்பாபிஷேகம் நேற்று நடந்தது. முன்னதாக அதிகாலை 5 மணிக்கு 4-வது கால யாகசாலை பூஜை, காலை 9 மணிக்கு மகா பூர்ணாகுதி, 9.30 மணிக்கு கடம் புறப்பாடும் நடந்தது. அதனை தொடர்ந்து காலை 10 மணிக்கு முத்து மாரியம்மன் கோவில் விமான கலசம், ராஜ கோபுரத்துக்கு புனிதநீர் ஊற்றி கும்பாபிஷேகம் நடந்தது.

விழாவில் முதல்-அமைச்சர் ரங்கசாமி, எம்.எல்.ஏ.க்கள் ஏ.கே.டி.ஆறுமுகம், கே.எஸ்.பி.ரமேஷ் மற்றும் திரளான பக்தர்கள் கலந்துகொண்டு தரிசனம் செய்தனர்.