திருமாலிருஞ்சோலை, தென் திருப்பதி என்று போற்றி புகழ்ந்து அழைக்கப்படுவது மதுரையை அடுத்த அழகர்கோவிலில் உள்ள கள்ளழகர் கோவிலாகும்.
இந்த கோவிலில் நடைபெறும் முக்கிய திருவிழாக்களில் மாசி மாதம் நடைபெறும் தெப்ப உற்சவமும் ஒன்றாகும். இந்த விழாவானது வருகிற 8-ந் தேதி மாலை 6 மணிக்கு மேல் 6.30 மணிக்குள் சிம்ம லக்கனத்தில் கஜேந்திர மோட்சத்துடன் தொடங்குகிறது.
திருவிழாவின் முக்கிய நிகழ்வான தெப்ப உற்சவம் 9-ந் தேதி நடக்கிறது. அன்று காலை 6.30 மணிக்கு மேல் 7 மணிக்குள் ஸ்ரீதேவி, பூமிதேவி சமேத கள்ளழகர் என்ற சுந்தரராஜ பெருமாள் எழுந்தருளி மேளதாளம் முழங்க தீவட்டி பரிவாரங்களுடன் தெப்பத்திற்கு புறப்பாடாகிறார். மேலும் அன்று மண்டூக தீர்த்தம் என்ற பொய்கைகரைப்பட்டி புஸ்கரணிக்கு வழி நெடுகிலும் நின்ற சேவை சாதித்து தொடர்ந்து பொய்கைக் கரைப்பட்டி தெப்பம் போய் சேருகிறார்.
அங்கு பகல் 12 மணிக்கு மேல் 12.30 மணிக்குள் தெப்பத்தின் கிழக்கு புறம் உள்ள மண்டபத்தில் சுவாமி எழுந்தருளுகிறார். அப்போது சுற்று வட்டாரத்தில் இருந்தும் வெளி மாவட்டங்களில் இருந்தும் ஏராளமான பக்தர்கள் வந்திருந்து சுவாமி தரிசனம் செய்வார்கள். தொடர்ந்து அன்று மாலையில் சுவாமி வந்த வழியாக சென்று கள்ளழகர் கோவிலுக்கு போய் இருப்பிடம் சேருவார். இத்துடன் இந்த திருவிழா நிறைவு பெறுகிறது. இதற்கான ஏற்பாடுகளை தக்கார் வெங்கடாசலம் நிர்வாக அதிகாரி அனிதா மற்றும் கண்காணிப்பாளர்கள் செய்து வருகின்றனர்.
