நாடு முழுவதும் நேற்று மகாசிவராத்திரி விழா நடந்தது. இதனையொட்டி வேலூர் கோட்டை ஜலகண்டேஸ்வரர் கோவிலில் விடிய விடிய பூஜைகள் நடைபெற்றது. காலை 6 மணிக்கு ருத்ராபிஷேகம், காலசந்தி பூஜையும், 9 மணிக்கு 1008 சங்காபிஷேகமும் நடந்தது. முற்பகல் 11 மணிக்கு சாமி, அம்மனுக்கு சிறப்பு அபிஷேகம், அலங்காரம் மற்றும் உச்சிகாலை பூஜை நடந்தது.
தொடர்ந்து மாலை 3.30 மணிக்கு விநாயகர் அபிஷேகம், தீபாராதனை, 5 மணிக்கு பிரதோஷ அபிஷேகம், 6 மணிக்கு ஜலகண்டேஸ்வரருக்கு சிறப்பு அபிஷேகம், சிவராத்திரி முதல் ஜாம பூஜை நடந்தது. இரவு 7.30 மணிக்கு தங்கத்தேரில் சாமி, அம்மன் பிரகாரத்தை சுற்றி வலம் வந்தனர். 8.30 மணிக்கு 108 சங்கு பூஜை நடந்தது.
9.30 மணிக்கு சிவராத்திரி 2-ம் ஜாமபூஜையும், 11.30 மணிக்கு ருத்ராபிஷேக பூஜையும், நள்ளிரவு 12 மணிக்கு மேல் லிங்கோத்பவ 3-ம் ஜாமபூஜை, தீபாராதனை நடந்தது.
இன்று அதிகாலை 4.30 மணிக்கு சிறப்பு அபிஷேகம், 4-ம் ஜாமபூஜை, 7 மணிக்கு திருக்கல்யாணம் நடந்தது. 9 மணிக்குசாமி வீதிஉலா நடக்கிறது. மகாசிவராத்திரியையொட்டி பக்தி பாடல்கள் மற்றும் பரதநாட்டிய நிகழ்ச்சி நடந்தது. நேற்று காலை முதலே பக்தர்கள் கோவிலுக்கு சென்று சாமிதரிசனம் செய்தனர்.
வேலூரை அடுத்த கருகம்பத்தூர் கிராமத்தில் உள்ள மனோன்மணி அம்மன் கோவிலில் நேற்று காலை 7 மணிக்கு கோபூஜையுடன் மகாசிவராத்திரி தொடங்கியது. இரவு 2 மணிவரை 5 கால யாகபூஜை நடந்தது. பக்தர்கள் கலந்துகொண்டு சாமிதரிசனம் செய்தனர். நாளை (ஞாயிற்றுக்கிழமை) சாமி வீதி உலா நடக்கிறது.
