சுவாமிமலை கோவிலில் திருக்கார்த்திகை திருவிழா 2-ந்தேதி தொடங்குகிறது || swamimalai murugan temple karthigai deepam start on 2nd

சுவாமிமலை சுவாமிநாதசாமி கோவிலில் திருக்கார்த்திகை திருவிழா வருகிற 2-ந் தேதி கொடியேற்றத்துடன் தொடங்குகிறது.

சுவாமிமலை கோவில்

தஞ்சை மாவட்டம் கும்பகோணம் அருகே சுவாமிமலையில் சுவாமிநாதசாமி கோவில் உள்ளது. முருகனின் ஆறுபடை வீடுகளில் சுவாமிநாதசாமி கோவில் 4-வது படை வீடாக கருதப்படுகிறது. முருகன் தனது தந்தையாகிய சிவபெருமானுக்கு ‘‘ஓம்’’ எனும் பிரணவ மந்திரத்தை உபதேசம் செய்த தலம் சுவாமிமலை என தலவரலாறு கூறுகிறது.

இங்கு முருகன் சிவகுருநாதனாக அருள்பாலித்து வருகிறார். பல்வேறு சிறப்புகளை கொண்ட இக்கோவிலில் ஆண்டுதோறும் திருக்கார்த்திகை திருவிழா நடைபெறுவது வழக்கம். அதன்படி இந்த ஆண்டு திருக்கார்த்திகை திருவிழா வருகிற 2-ந் தேதி கொடியேற்றத்துடன் தொடங்க உள்ளது.

முன்னதாக 1-ந் தேதி விக்னேஸ்வர பூஜை, வாஸ்து சாந்தி பூஜைகள் நடக்கின்றன. 2-ந் தேதி கொடியேற்றத்தையொட்டி சுப்பிரமணியசுவாமி பரிவாரங்களுடன் மலை கோவிலில் இருந்து உற்சவ மண்டபத்தில் எழுந்தருளி அருள்பாலிக்கிறார். 3-ந் தேதி படி சட்டத்தில் சாமி வீதி உலா, நடக்கிறது. அதைத்தொடர்ந்து விழா நாட்களில் பல்லக்கு, பூத கணம், ஆட்டுக்கிடா, வெள்ளி மயில், யானை, காமதேனு, வெள்ளி குதிரை உள்ளிட்ட வாகனங்களில் சாமி புறப்பாடு நடக்கிறது.

10-ந் தேதி திருக்கார்த்திகை அன்று தேரோட்டம் நடக்கிறது. 11-ந் தேதி காவிரி ஆற்றில் தீர்த்தவாரி நடைபெற உள்ளது. 12-ந் தேதி திருக்கல்யாணம் நடைபெற உள்ளது. இதற்கான ஏற்பாடுகளை கோவில் நிர்வாகிகள் செய்து வருகிறார்கள்.