கடலூர் கஜேந்திர வரதராஜ பெருமாள் கோவில் பிரம்மோற்சவம் தொடங்கியது || gajendra varadaraja perumal temple Bramorchavam

கடலூர் கஜேந்திர வரதராஜ பெருமாள் கோவிலில் இந்த ஆண்டுக்கான பிரம்மோற்சவம் கொடியேற்றத்துடன் தொடங்கியது. இதில் பக்தர்கள் கலந்து கொண்டு தரிசனம் செய்தனர்.

கடலூர் கஜேந்திர வரதராஜ பெருமாள் கோவில் பிரம்மோற்சவம்

கடலூர் புதுக்குப்பம் போலீஸ் சூப்பிரண்டு அலுவலகம் அருகில் கஜேந்திர வரதராஜ பெருமாள் கோவில் அமைந்துள்ளது. இக்கோவிலில் ஆண்டுதோறும் பிரம்மோற்சவம் சிறப்பாக நடைபெறுவது வழக்கம். அந்த வகையில் இந்த ஆண்டுக்கான பிரம்மோற்சவம் நேற்று காலை கொடியேற்றத்துடன் தொடங்கியது.

இதையொட்டி சாமிக்கு சிறப்பு அலங்காரம் செய்யப்பட்டு, மகா தீபாராதனை காண்பிக்கப்பட்டது. பின்னர் காலை 9 மணிக்கு கோவிலில் கொடியேற்றப்பட்டது. இதில் பக்தர்கள் கலந்து கொண்டு தரிசனம் செய்தனர்.

இன்று(வியாழக்கிழமை) காலை 9 மணிக்கு யாக சாலை ஹோமம் மற்றும் திருமஞ்சனமும், 26-ந் தேதி மாலை 6 மணிக்கு திருக்கல்யாண உற்சவமும், 27-ந் தேதி புரட்டாசி திருவோண கருடசேவையும், 29-ந் தேதி 1008 சகஸ்ரநாம அர்ச்சனையும், ஊஞ்சல் சேவையும் நடக்கிறது. இதற்கான ஏற்பாடுகளை கோவில் நிர்வாகிகள் மற்றும் பொதுமக்கள் செய்து வருகின்றனர்.